ANGPTA Changtongya Unit mezüng Lokti Senden amen

Changtongya, October 26 (TYO): Primary school tesayurtem senzüka doktsüba otsüji lenmang aisü nung lir; Pei tata tangutsü tim magütsüi küm jenti yutsüba asoshi Primary School tesayurtem temeja tentet ka alitsü nüngdak ta rejema, pei sasa pei temeten bushitsü meji All Nagaland Government Primary Teachers’ Association (ANGPTA) telok ya tentet, ta ANGPTA Tatong Tir Wb. Along Changkiri-i 1st ANGPTA Changtongya Sub- Unit Lokti Senden EBRC CTN nung jembidang shia liasü. Paisa ANGPTA telok ya PE aser Hindi tesayurtem dak alaka Primary school-tem nung inyaker ajak mapa angudangyongi züngsem nung züngoker aser ANSTA den kecha tesendaktep mali ta senden nung adenertem dang jangjashitsü.
2016 küm nungi tenzüka joko district ajak nung ANGPTA telok tentetogo aser iba tentet ajanga Primary School tesayurtem asoshi jenjang tajungba akümtsü asoshi Sorkar aser Department den tajungtiba nung tongtepratepdar, anungji züngsem ajak longjemer yariteptsüla, ta Tatong Tir ajangasa shia liasü.
Iba senden nung Wb. P.Onen Lkr, Coordinator EBRC CTN ajanga tajungshi o jembidang tesayur ka akhüm sama aoba asoshi sasa bilemba olen ka shia liasü. Iba teraji tesayurtemi tesayur ka ama melitetba ajanga adokba lir. Anungji ANGPTA tentetba ya tesayur jenjang tajungba akümtsü nükjidong nung dang masü, saka tesayurtem aser yamaji Department nung inyakertem timi azüoktsü temulong nung alitsüla, ta paisa ashi.