‘Angry Indian Goddesses’ film sayatsü anogo thinenogo

November 16, 2015: Pan Nalin-i direct asüba “Angry Indian Goddesses” (AIG) film sayatsü anogo ano khen thinenogo. Iba film ya taruba ita ang sayatsü sentong yangluogo.

Iba film ya Toronto International Film Festival dena international film benjung aika nung kanga tushiogo aser Salman Khan-i shilem agia aliba “Prem Ratan Dhan Payo” film sayanü (November 12) külemi sayatsü sentong liasü. Ajisüaka iba anogo thinener “Tamasha” film sayanü (November 27) sayatsü senong renemer liasü, saka iba anogo jia thinener December 4 nü ang sayatsü renemogo, ta sangdong ka ajanga metetdaktsü.

“AIG ya onoki December 4 nü sayatsü. Iba film asoshi international tsütsü nungi telangzüba tajung nguogo. Film ya bendang linük asoshibo 2016 tetenzüklen ang sayatsü. Onoki AIG ya asen linük nung aliba nüburtem dang mezüng sayuner,” ta Nalin-i ashi.

Angry Indian Goddesses film ya tetsür tenet otsü lir. Iba film nung Frieda-i la kibong akümtsü atema osang metetdaktsütsü asoshi lar medemtsürtem Goa-i jaok ajisüaka parnok benjung ang mungtepba angutsü. Film nung Sarah-Jane Dias-i Frieda ama shilem agia lir.

Film nungsa Sandhya Mridul, Tannishtha Chatterjee, Anushka Manchanda, Amrit Maghera, Rajshri Deshpande aser Pavleen Gujral nungera shilem agia lir.

Nalin-i direct asüba film ya Vishal Pandya-i direct asüba film “Hate Story 3” den külemi sayatsü. “Hate Story 3” film nung Zareen Khan, Daisy Shah, Sharman Joshi aser Karan Singh Grover nungeri shilem agia lir.