ANHTU-i DoSE nung itasen meshia lungkak ait

March 15, 2017 nü Kohima nung ANHTU kübok CSS Hindi tesayurtemi DoSE, Kohima kima longakak aitba noksa nung angur.

Kohima, March 15 (TYO) : Taoba ita 9 tashi itasen magütsüba atema tejashi sayua All Nagaland Hindi Teachers Union (ANHTU)-i tanü nungi tenzüka Directorate of School Education (DoSE) nung mener lungkak aittsü tenzükogo.
CSS Hindi tesayurtem parnok 1000 shi tanü DoSE nung adenshi, parnok nem itasen agüjang ta takhangba agüja lungkak ait.
Parnoki Hindi aser English oshitem nung tezülubatem amer tejashi sayuogo saka parnoki ozüng alema mapa meinyak.
“Onok nem itasen agüjang”, “Education Department indang mapa kecha tesayur medeni meinyaktettsü”, “Sorkari onok temeten ajembang mayutsüla”, “Tesayurtem dak tenük yoka mapa teinyak” aser “Onoki nenok tajungba tenzüktsü atema onoka tenzükang” ta tesayurtemi tezülubatem amer lungkak ait.
Tanü lungkak aitaka Department ketdangser mesüra sorkar nungi teshimtet nübotem shingaia parnok den majurutep, ta ANHTU lennirtemi ashi.
Yashi Chief Secretary, Pankaj Kumar-i parnok jaok aser idangji sorkari ita ana indang itasen agütsütsü agütsütsü nangzük. Ajisüaka, ANHTU-i ita 9 indang itasen ajunga agüjang ta shia ibaji magizük, ta ANHTU lennirtemisa metetdaktsü.
Asünga State Civil Secretariat kima nung lungkak aittsü ta ANHTU-isa shisem.