Anil Kapoor aser Shekhar Kapur na longjemtsü

Monupii/May 17, 2019 (Agencies): Oscar award atema nominate asüsang film yanglur Shekhar Kapur aser Bollywood actor tejan Anil Kapoor nati project tasen ka asoshi maparen tenzüka aoba osang lemsatepa liasü.
‘Mr.India’ film sayar külen küm 31buba nung Anil aser Shekhar na longjemba ya tan agi mezüng asütsü. Iba osang ya twitter ajanga Shekhar-i lemsatepa liasü.
“Mr. India 2 film mesüra movie tanga ka yanglutsü asoshi küna sensaksemogo. Nai pranok dang shiang @AnilKapoor,” ta tena tangokba noksa ka den külemi Shekhar-i iba olen lemsatep.
Anil-ia twitter ajanga kasa noksa den ‘Shekhar den tanaben longjema inyaktsü asoshi kanga jangrar’ ta telangzüba agüja liasü.
“Taoba mapang ama ni bilemer @shekharkapur o ni longjema project tasen ka atema jembidar aser iba ya jangratemtsüka asütsü. Taoba Mr. India film takok ngua yangluba ama project tasenba ya nüburtemi saklotsüsa yanglutsü imlar,” ta arishi küm 62 tain Anil-i ashi.
1987 küm sayaba ‘Mr. India’ film nung Amirsh Puri, Sridevi aser Satish Kaushik nungeri tongti shilem agia liasü.