Anitettsüba purtem

India nung kin aika rongnung kar shimteta Sheduled Tribe aser Scheduled Caste ta jenjang balaka nung shiteta ayurtemji tazüngba aser temetetba nung aser rongsen kaa aitba jenjang nung tangar memenepi teküpbok tia nung alirtem  lir. Iba jenjang nung ayuba nükjidongji tazüngba aser temetetba nung aser kaa aitba nung tejaklen jenjang tajung nung alirtem menepa anitettsü asoshi lir. Tetezü, kasa linük aser yimten ka kübok sensosangersa süaka temeteter o memetetter na aser takar o makar na tsüngda lemdanger temetetertemi memetetertem aser takartemi sensakertem aser jenjang tajung nung alirtemi tepetzük tia nung alirtem yaritsü nükjidong nung linük ozüng küma latetba mapa tajung ka lir. Linük nung iba ama maongka aser taochi ka mali asübo asenok ama Naga nunger shirnok Scheduled Tribe telok rongnung rüsema lir, item yabo tazüngba nung aser government mapai aiba maparen nung kecha jenjanga mengui tangar temetetter kintem kübok alar kümer lila ta bilemer. Aji oda, tang All India jenjang nung government-i yaria technical azüngtsü asoshi lenmang lapoktsüba aser government mapa asoshi tatidang agiba nunga asenok Naga nunger ama nem shilem balaka lemzüka yutsübaji scheduled tribe telok nung züngoka aliba ajanga lir. Iba amaji ka masü nungbo Naga nunger tazünger aser temeteter liaka tangar tazünger aser temetettertem den toktepabo technical azüngtsü asoshi menden kata mengui lila aser government mapa nunga IAS, IPS aser IFS ta asüba jenjang yabo Naga nunger shingaia majangzüktetla ta bilemer. Iba amaji tejaklen alirtemi tesülen alirtem nema parnok menepa arutsü asoshi tachitsü aser tajemtsü karbo yutsüba ajanga tesülen purtem süaka meranga inyakertemibo tejaklen alirtema menepa mesüra  ajateta otetter. Iba kasa nükjidong nung Nagaland nunga kasa Naga nungertemsa süaka teküpbok jenjang nung alirtem kin kar shiteta backward ta asüba telok tenüng nung yuja lir. Atangji, iba sentong ajanga Naga nungertemsa süaka shirnok tazüngba aser temetetba nung dang masü saka alima renloka aoba maparen  nung tangar memenepi ali, parnok kanga ajangzükdagi aser iba teyari ajanga tesülen purtemi tejaklen pur maparen aika nung menepba dang masü saka tajungba kümogo. Iba ama tia ka nung joko Nagaland kümer küm 50 dak tali süia aodang, Nagaland nung amshiba temzüng ozüng aser sentongtem aika meyipa reprangshia melenshitsü nüngdakba reprangtetter, aser item rongnungji backward ta asüba nüngja aser inyakyim ya ka asütsü. Tazüngba aser temetetba aser libaliroren nung teküpbok tia nung aliyonga, parnokji tesüleni aor masü saka tejakleni aotsü meranger. Aji oda, tejakleni odaktsütsü asoshi government-ia meranger, iba jagi parnokji tangar dang nungi balaka shimteta ayur. Anungji, parnokji ‘backward group’ masü saka “Scheduled group” asütsüla. Iba nüngja tasenba nungji asenolki taoba hopta nung ‘Koma süla ? ‘ ta asüba onük nung shisadanga langzütepba amato, joko Nagaland nung tazüngba aser government mapai aiba maparen nung maongka balaka shiteta agütsüba ya kin apia masü saka sensaker aser tilar nem agütsütsüla. Tangbo, backward tribe tenüng nung lemzüktsüba shilem ya backward purtem rongnung takar aser tulur chirnurtemi dang agir aser parnokjibo backward tribe nung madener ‘advance tribe’ purtem danga tajungba. Iba jagi backward ta ajaba kintem nungi shitakba teyari nüngdakba pur tilar aser sensakertembo mangur aser matar. Iba jagi government-i yariyonga tilar aser sensakertemibo teyariji magitetter. Tulurtem rongnungisa tuluba aser takartem rongnungisa takarba akümdang tilarbo tilaba aser sensakertembo tesensakba akümbaji iba ama sentongbo tajung saka tensa dak mapet amshiba ajanga ataloker. Iba ama temzüng ozüng aser sentong ya mapang mapang shia government nung alirtemi reprangshia shitakba teyari nüngdakertem angutsüsa inyaktsüla.