Ankara, February 18 (Agencies): Turkey yimtiba, Ankara nung bomb lendong tesashi ka yasüng, Bodbar aonung atalokdaktsüba sülen lendong atalokdaktsüba maparen kepzüktsü olen ka Turkey Ato Kilonser, Ahmet Davutoglu-i tanü, Brehostibar nü amokmerena metetdaktsüogo.
Ankara yimti tiyongtsülen mitkar tesepti, parliament ki aser tongti sorkar office balala tentetba tesem anasa, gari lenmang nung bomb alenokba car ka gari ka pokdakja yasüng lendong atalokdaktsüba osang jangjaogo.
“Turkey sorkar anemer Kurd telungpurtem den sentaktepa alir, YPG ta ajaba Syria nunger Kurd kiralongrartemi tan lendongji atalokdaktsüogo,” ta Davutoglu-i tanü temulung malemba olen ka metetdaktsüba den külemi, tan lendong atalokdaktsüba maparen kepzüktsü amokmerena liasü.
Yasüng lendong nung nisung 28 tashi poksetba osang tang tashi nung jangjaogo.
Yasüng lendongji ataloker ghonda ishika tsüngda nung Turkey-ia par mitkar tayimtsütem yoka Iraq anüdoklentip tsütsülen tesep tentetba Kurdistan Workers Party (PKK) telok amakba osanga jangjaogo.
Syria nung par mitkar tayimtsütemi bomb-tem tsükdakja YPG tesemtem maneni amaktsü renemba osang ka Davutoglu-isa metetdakja liasü.
“Yasüng lendong atalokdaktsüba maparen nung YPG aser PKK telok napronglai shilem agiogo aser par telok meshimeshia mesamatsü tashi ozü Turkey-i parnok den raratsü nangzüker,” ta Davutoglu-i ashi.
“Yasüng Ankara nung lendong atalokdaktsübaji ozü telok mapa masü. Davutoglu-i ozü telok nem tai tongloktsür külen Iraq aser Syria na nung par amaktsü maparen taoba mapang nungi tesashiba inyaktsü renemer lir,” ta YPG otongdar, Saleh Muslim-ia metetdaktsüogo.
You must be logged in to post a comment Login