Anna Hazare-i ano Lokpal atema takhangba aguja longkak aittsü

New Delhi, August 30 (Agencies): Ochimashi anema inyaker lenir, Anna Hazare-i Bodhbarnü shidi ka ajanga Ato kilonser, Narendra Modi dang, Lokayukta atema takhangba agüja ano linük yimtiba, Delhi nung longkak aittsü, ta metetdaktsü.
Ochimashi anema inyaker Anna-i shidi nungji, Lokayukta meshim tashi aser Swaminathan report atema meinyak tashi Delhi nung ano longkak aittsü, ta shia lir.
Arishi küm 80, Anna-i, “Ni ano shidi ka ajanga linük yimtiba nung longkak aittsü anogo aser tesemji metetdaktsütsü,” ta ashi.
Centre nung Narendra Modi-i aniba sorkar aija Hazare-i, Centre nung Modi-i anir sokrkar akumba sülen küm asem jungaka tang tashi Lokpal meshim, anungji pai Modi’er sorkar anema ano longkak aittsü, ta metetdaktsü.
“Ochimashi maliba India ka yangertsü atema maparen tenzüker küm trok jungogo. Ajisüaka küm trok sülena ochimashi anentsü atema ozüng ka junga lateta mali,” ta Anna-i shidi ajanga Ato kilonser nem metetdaktsü.
“Joko küm asem tashi ni ner sorkar dang Lokpal aser Lokayuktas tentettsü atema nenshia metetdakja arur, saka nai kü shidi telangzüba magütsü mesüra kecha meinyak,” ta shidi nungjisa shia lir.