Anna Hazare-i Lokpal atema takhangba agüja longkak aittsü

Pune, March 29 (Agencies): Bodhbarnü Anna Hazare-i, Union sorkar tashii aruba sülen küm asem jungaka sorkari Lokpal atema meinyakba anema longkak ait tenzüktsü, ta metetdaktsüogo.
Tanü nikongdang par yimtsüng, Ralegan Siddhi nung osangbenertem den jembidang Hazare-i, kobi melii pai shidi ajanga Ato kilonser, Narendra Modi dang longkak ait tenzüktsü anogoji metetdaktsütsü, ta ashi.
“Tesüiba küm asem nung temelenshi kecha mali aser iba mendenji tang tashi tazüng lir. Ajisüaka opposition lenir ka meliaka CBI tongti shimtetra kechiba Lokpal atemabo shimtsü makoker?” ta pai asüngdang.
Hazare-isa, opposition lenir maliba ajanga Lokpal meshimaka state ajak nung Lokayuktas shimtsübo akoktsü, ta ashi.
Centre sorkari, Lokayuktas shimtsüji state sorkartem teinyaktsü mapa lir, aser parnok dang ibaji metetdaktsüogo, ta ashi.
“Ajisüaka Bharatiya Janata Party (BJP) sorkar tashi nung aliba state tem nunga Lokayuktas meshim. BJP sorkartemi Ato kilonseri tuyuba mangar ta asubaji tagizüktetla masü,” ta Hazare-isa ashi.
Tang aliba sorkari ochimashi anentsütsü atema inyaker ta asubaji atangji nung meinyaker, ta pai aitsü.