Anna Hazare indang taküm otsü October 14 nü sayatsü

Mumbai, September 13 (Agencies): Lokti atema inyaker, Anna Hazare indang taküm otsü October 14 nü sayatsü, ta Hombarnü film producer temi metetdaktsüogo.
“Anna: Kisan Baburao Hazare” ji minute 130 talang Hindi feature film lir aser iba film ji küm ka shi agia par yim, Ralegan-Siddhi (Ahmednagar, Maharashtra), Mumbai, New Delhi, Jammu & Kashmir, Ladakh aser Rajasthan nung tangok, ta producer Manindra Jain-i metetdaktsü.
Film teaser ji September 15 nü sayatsü, iba sülen India tesem ajaklen media ajanga ajungkettsüba den külemi “The Kapil Sharma Show”, “Taarak Mehta Ka Ulta Chashma” densema televison sentong aika nung ajungkettsütsü, ta Jain-i ashi.
“Iba film ajanga lokti atema inyaker arishi küm 79 tain, Hazare taküm otsü sayar. Iba otsüji pa lanuwa anogo nungi tenzüker, pa mapang tatsüka Indian Army nung aliba, pai soseta asütsü khen merangba, pa Army nung aliba sülen timtemba, Ralegan-Siddhi nungi tenzüka yimtsüngtem nung temelenshi bener arutsüba, pai linük nung ‘India Against Corruption’ movement tenzükba, koba ajanga RTI aser Lokpal ozüngtem benokba otsütem lir,” ta Jain-i osangbenertem dang ashi.
Iba film ya Rise Pictures Private Limited-i produce asür aser Shashank Udapurkar-i direct asür. Iba film nung Anna Hazare shilemji nüngtugu Marathi actor kati agi aser actress Tanisha Mukherjee-i journalist shilem agi.
“Pa timtemba, pai rarabatem, ochitem ajanga tanü putu nung Anna ama aika adoktsü asenok ajungmesor. Iba film ajanga nisung aika ajungmesotsü nükjidong nung onoki meranga inyakogo,” ta paisa ashi.
Iba film ya tamasobo Hindi nung dang sayatsü saka tesülen alima nüburtemia reprangtettsü asoshi English aser India oshi balala aika nung sayatsü, koba ajanga India tesem ajaklen nüburtem ajungmesotsü.