Annan-i Rohingya nübur anema inyakba ken o bushisüngdangtsü

Bangkok, November 29 (Agencies): Myanmar nung alir Rohingya Muslim nüburtem anema ozüng alema inyakba osang bushisüngdangtsü nükjidong nung taoba United Nations (UN) Secretary General, Kofi Annan-i Myanmar kübok Rakhine state tonga tanü, Mongolbar nü ogo.
Nübur longsoa aliba Buddhist nüburtem aser nütsüng yongsük ajema alir Rohingya kin na tsüngda mangatettep ken o adoka, tongpang rarabaren anenja, tebentetbaren bener arutsütsü asoshi tentetba luden lenitsü atema shimba sülen Annan-i tan agi Myanmar tanabenbuba semdanger lir.
Annan-i taküm September ita mezüngsüa Rakhine state tsüngdong semdanga liasü saka kiralongrartemi taruba ita, October 13 nü Maungdaw district nung tentetba police border post 3 tashi amakba sülen tensa azüokdaktsütsü nükjidong nung Myanmar sorkari par mitkartem Rakhine state-i yok.
Iba mapang nungi tenzüka, mitkartemi par mitkar mapatong tenzükba sülen tanü tashi nung parnoki temulung melemi bilemer nisung 69 tepsetba aser mitkar züngsemtema nisung 17 tashi asüba den nisung 434 tashi tepuokdak puoka ayuba osang bushitetogo.
Mitkartemi tensa azüoktsü tatemtsü nung timtem toushi ajurua alirtem nem nungdakba chiyongtsü aser teyari osettsüset agütsütsü maparen ajunga nokdangba den alima tetendanger aser osangbenertema mepetmesü agi asüngba Rakhine state telungi maitdaktsüi lir.
Rakhine kübok Maungdaw district nung tongpang kanga sashia raraba ajanga nübur nisung 30,000 shi pei talikdak toktsür tesem balala nung jenoka alitsüsa akümba aser mitkartemi nüburtem oda tepsetba, tetsür takümtem tashiyim agi raksatsüba, rakzükraktemba aser Rohingya nunger yimtsüngtem nung nisung aliba ki meyirijang jenti rongdokja, tashiyim inyakba osang bushiteta lir.
Annan-i tan Myanmar semdangdang Myanmar lenirtem den Rangoon, Naypyidaw aser Rakhine nunger nung tsüngdong ajurutepa senden amentsü sentong renema lir.