Ano maneni temeshi laishiba nung aibelena zülua aliba kar bushiteta yangi adoktsür

– S. Medem Kichu, Lerie colony, Kohima.

1. Mathi 6:32 nung yamai zülua lir, Kechiaser Bendangertemi item indang shisa bulur. Item indang shisa bulur ta masü, item indang bushir ta ang shitakba sür nung aibelena zülu.
2. I Korint 13:11 (b) nung tangbo tain aküm nung ni tanur yimsü indokogo ta zülua lir. Yimsü ta masü, yimya ta amshiba ang tapetba asütsü, kechiaser iba ya Paul-i pa tain aküm nung tanur yimya indokba indang ashiba o lir. English Laishiba nunga yimsü ta masü yimya ta ang zülua angutsü.
Iba aibelenaba ya 1st translation (1964) nungi tenzük sür nung koda sür odang toktsür?
3. I Korint 12:11 nung tanela kesai pei mulung agi Nisung ka nem lemsa-a apuoktsür ta zülua lir. Ka nem lemsa-a apuoktsür ta masü nisung kaka nem mesüra nisung shia nem lemsaa agütsür ta amshitsüla. Aser apuoktsür ta iba oren nung amshiba ya tapet o masü. Aser ano nisung ka dang asünungbo koda sur lemsatsü, ana tema nungi idang lemsaba o ya amshitsü akok.
4. I Korint 7:2 nunga yamai zülua lir. Saka japujari onsara ali nung tetsür shia pei pei kinungbo yuang ta zülua lir. Süra teburbo koda! Teburtembo kinungtsü mayutsüana? English Laishiba aser Ao laishiba tejen edition nungbo nung kesa o, tebur-a kinungtsü yuang aser tetsür a kinungbo yuang ta zülua lir.
5. Anitet 1:11 (a) nung Anungji Ejib nungeri Alartem tanüker tokja-a parnok rishikangshia mapa inyakdaktsü ta zülua lir. Alar ta masü, tanüker ta amshi nung ang tapetba asütsü, kechiaser Alar kati kesa tangar alar ka merenshia mapa tulu inyakdaktsü makok. English o nungi slave ta masü, task masters, slave masters ta zülua lir aser item ya Alartem den temaba jenjang nung alirtem lir.
6. Anitet 6:8 (a) nung Ne teka mekanga azüngashiogo ta shia lir, saka yamaji mesüi. Ni teka mekanga azüngashiogo ta amshiba ang tapetba asütsü. Kechiaser iba o ya Tsüngremi Mosa dang pai Israel nunger kümzüktsü atema Pai teka mekanga nangzükba o kesaji lepshia Mosai Israel nunger dang ashiba lir.
7. Yerimia 7: 29 (b) nung Kechiyong Kibubai Pa ain adokba putu magizük aser jendokadok ta zülua lir. Yamai mesü-i English o nung shia aliba amaji yanglushi nung kanga dang tajungba asütsü ta bilemer. Iba oji yamai kechiaser iba putui Kibuba jashia ain adokdaktsü nung pai parnok magizük aser jendokadok. (NRSV Bible) iba tetezüji iba putui Kibuba Tsüngrem ashiba mangai tai lenmangi ao nung pa jashi ain adok aser parnok jendokba indang ashir ta angateter. Saka tang zülua aliba nungjibo ojang kar agi mapensar ta bilemer.
8. 1 Timothy 6:17 nung yamai zülua lir, saka Tsüngrem shibai kechisarena asenok nem peria agitsü ajak agütsür, Pa dak imlatsü mela-ang ta zülua lir. Imlatsü melaang ta masü, imlatsü sayuang mesüra ajang-ajanga shiang ta amshiba ang tapetba masü na? Kechiaser Tsüngrem dak amangtsü atema temelaba agüjang ta amshiba o yabo tapet masü ta bilemer.
9. Anitet 20:1 nung Tsüngremi item o jembia ashi ta zülua lir, yamaji mesüi (a) Tsüngremi item o ajak ashi, mesüra (b) Tsüngrem item o jembi, ana rongnung ya ka dang amshitsüla kechiaser ashi aser jembi ta asüba anaji tetezü ka dang lir.
10. T. Ken 35:15 (b) nung Parnok tanen makai kü dak azüker ta zülua lir saka yamaji mesüi Parnoki tanen makai tiyazu khuli agi ni aitsür ta amshiba ang tapetba asütsü ta bilemer. English nung. They slandered me without me without ceasing NIV Bible.
11. Mark 14:10 2nd para title nung Yihudai Yisui ashioktsütsü nangzükba ta zülua lir. Yamaji mesüi Yihudai Yisu ashioktsütsü nangzükba ta melenshitsüla.
12. Lipok 19:4 nung Lanu ain ta zülua lir. Lanu ain ta masü. Lanu-tain ta züluba lir (Lanu-tain ajak arua kiiji meketpang)
13. Solomon ken 8:8 nung ozü tenu tenüla ka lira ser la dak mama maket ta zülua lir. Iba oren ya tera melenshi nungang tajungba asütsü, kechiaser tetsür shinga dak-a mama maket malir. Parnok tanur asüdang madoker tang ashi kodang tain kümdir idangjiang adoker. Aji asünung iba melena yamai ang amshi nung shidak asütsü. Ozü tenu tenüla ka lira ser ano la dak mama madok. English nunga maket ta masü ano madok ta dang zülua lir. NIV & Family devotion Study Bible etc. Item ya ang latest translation asünung iba ang shidak asütsü. Iba indang ashiba nung ya kecha maksü mali saka nisung ka temang koma ainer iba otsü ang shidak zülutsü tim asüba agi iba indang ya ashir. English Laishiba nunga tejen edition kar nungbo “maket” ta zülua angutsü.
14. Anitet 28:1 (b) nung, Anungji parnoki kü tsüngdang putir ama tenzükdaktsü ta zülua lir. Tenzükdaktsü ta masü, tenzükdaktsütsü ta züluba lir. Kechiaser iba o ya Tsüngremi Mosa dang Aaron-er chirtem anir arua Putir ama pa tenzükdaktsütsü indang ashibo o lir.
15. Anitet 40:15 nung, Aser parnoki putir mapa nungi nai tenzüktsü atema ta zülua lir. Nai ta masü, ni tenzüktsü atema ta züluba sür nung aibülena zülu.
16. Anitet 30:24 nung, Olive totsü Hin ka nai bener arung ta shai lir. Hin ka bener arung ta dang amshi nungbo aseni kecha mangatettsü. Hin ya Ibri (Hebrew) O lir aser totsü amshiba pongdang tenüng lir.
Hin ka nungji totsü liters 5 mesüra gallon ka asütsü aser ibai parnok tekülem mapang nung amshitsü tekülümdaki bener arung ta ashibo o lir. Asen Ao o nung Bible commentary maka nungji oda yamala o yabo (Under bracket) nung tera rasa-a zülua toktsü nungbo ajak atema kanga dang tajung asütsü.
17. Levi 3:7 (b) nung, pai aji kibuba madak ang tenlatsüla ta zülua lir. Iba-o ya tai lir, kibuba madak ang ta masü kibuba madang tenlatsü ta züluba lir.
18. Levi 5:11(B) nung, Oren ka anaben amshia lir, ibaji ya. Pai iba nung totsü süshia mesüra, pai iba nung totsü sushia ta zülua lir. Shidakba o ji yamai asütsü:- Pai iba nung totsü mesüra Liangmesen süshia shioktsüla.
19. Levi 11:17 nung, komorant azü, strock azü ta lir. Azü ta masü Ozü ta zülutsüla, kechiaser itüm tenüng ya ozütem tenüng lir. Komorant ozü, strock ozü.
20. Yehousoa 7:5(B) nung, aser nuportüm tasü pelepadok aser parnok temulungjang yemsa ta zülua lir. Iba o yabo English o den meputep a to! English Laishiba nungbo iba osangji angashia tetsübu nung nüportüm temulungjang yimsa aser tzü ama aküm ta dang zülua lir, saka tasü pelepadokba indang zülua mangur.
Asen Ao o nung ashiba amai asü nungbo, Ai nunger-i parnok 36 tepsüt aser tanüngba Israel nunger ajakji aseni Ak tar pelepba amai tasüji peleper alitsüji parnok ajak spot nung süadoker alitsü südi. Asen Ao Laishiba nunga tejen Edition nungbo English Laishiba nung aliba amaji angur. Iba O ya 2008 Edition nungi tenzüka lir.
21. J.Adok : 1: 3rd para title oji tera melenshi nung ajungtsü ta bilümer kichiaser iba o ya Yesui Yohan dang tarutsü anogotüm indang mangdang nung sayuba lir.
Aji asü nung Khrista mangdang ka ta masü, Yohan mangdang ka ta amshiba ang tapet asütsü ta bilümer.
22. Luk 13:11 nung, Tetsür ka küm 18 Mokokminba tanüla ka agi shiranga liasü ta zülua lir. Yamai mesüi temang koktena shirangdaktsüba tanüla ka agi shirangdakja-a liasü ta melen nung tapet asütsü, Kechiaser tashidak rongnung Mokokminba tashidak tenüngbo malitsü südi. Iba tenüng ya 1964 küm nungi odang amshia arudar.
23. 2 Timoty 4:3 (B) nung, tesayur telong telong ayutsü ta zülua lir. Telong ta mesü-i telok ta amshitsüla, kechiaser iba o ya osettsüset indang ashir masü, nisungtüm indang ashir. Tesayur telok telok ayutsü ta melentsüla. Iba o ya 1964 küm nungi o dang amshia arudar.
24. Kolosi 3 nungi 2nd paraji tekong 18-25 tashi lira ser iba para nung titleji English & Ao o na meputep. Iba para (tekong) nung zülua aliba otsüji züngdangra, English nung amshiba title den ang putepa lir, aser asen Ao o nung amshiba title denbo meputep ta angateter kechiaser iba o ya sobaliba indang masü, Khristan kibong ka nung Tsüngrem o-i ashiba alitsü indang ashiba lir.

Temetettsü ka:-
Aibelena zülua aliba kechisa ni bushiteta sayur iba ya ni itüm yabo tai ta Bilümba sayurba dang lir, ashiko karbo ni ashiba ya ang tai asütsü akok. Yamalaji ka lirabang taitümji indoker koba nung temelenshitsü lir ta angur, itümji next Revision nung melenshi nung kanga dang tajung asütsü.