Ano mapa matem !

Nagaland nung February 1, 2017 anogo nung Municipal aser Town Council election agitsüba liasü saka nübortemi azü dena tenla agüja nokdangba ajanga magitet. Ibaji dang masü saka government-i tashiyim agi iba Urban Local Bodies (ULB) election agitsü merangba ajanga nisung taküm dena sama nungji tejashi marem nübortemi T.R.Zeliang chief minister menden nungi aludaktsüogo. Iba sülen dang, tang anogo ishika Nagaland nung longkak aitba aser mokdangba sentong kecha mali süngjem-süngjema lir. Iba jagi asenoki ULB election dak aketba tebilemtsütem ajak temadoker amai bilemtsüa akok. Ajisüaka, tang süngjema aliba tensa mapang ya tajung-tazü süngjemerba masü saka ano kodangang kechi ataloktsüar memetetba tia ka nung Naga nungertem lir, kechiyong ULB election dak aketba kenobo ano kata tejembia mejembii dang anendaka lir. Aji oda, mashi mapang ka nung tzüim tzüsem anokshia yipru ait ama asen lima nung tanabena ataloktsü ana nung alinungji amangba purtemi sarasadem to manentsüla aser yimsüsürtemi nübortemi akangba onüktem indang süoki ia bilema, lendong atalok matai, mapa küma inyaktsüla. Nübortemi aginüba shitakba takangbajibo Nagaland Municipal Act khen jungjunga reprangshir yanglushidaktsüner. Iba sülenji dang Nagaland ajak nung ULB election agitettsü. Ajisüaka, ano ULB election agitsü merangdangba ajanga nisung asü aser teyirua yiru nungji, iba maparen bushisüngdanga inyaktsü asoshi nisung asemi akümba Inquiry Commission ka shimtsüla aser parnok bushisüngdang mapa metenzükdang Longleng DC, Dimapur Police Commissioner aser nisung khasetba maparen nung dena alir police-tem mapa nungi anenja atatsüla ta Nagaland Tribes Action Committee, Kohima aser Joint Co-Ordination Committee, Dimapur purtemi takangba agüja lir. Tang asenok ajak asoshi tebilemtsü aser lendongbangji aji lir. Government-i Municipal act yanglushitsü apusoyonga NTAC aser JCC purtemi akangba amaji DC, Police Commissioner aser police-temji suspend mesütsüra kechiang ataloktsüar memetet. Item ama tarutsü nung tamangutsü lendong ajurutsü alibatem yimdangi arua bilemdanga yimsüsürtemi nübortem lenchii oa inyaktsü kanga nüngdak kümogo. Aiben government nung alirtemi nübortemi akangba mapatemji ataloktsüra government tashimait akümer amai bilemer, iba jagi nübortemi longkak mait tashi government-i inyaktsüba tim mapatema meinyaker. Item ama tarutsü lendong timtem ataloktsü ama asen jakdang anendaka aliba den ano ULB election dak aketba ken o aser tebilemtsü agi Naga kin shia pei pei sasep nung tebilemtsü khuret aika mebentettet anünga lir. Atangji, nübortemi mulungba anema government-i ULB election kechisüdirsüaka agitsü merangba ajanga Naga lima kanga akoksaogo aser kanga benjaogo. Ajisüaka, nisung taküm nung lendong timtem ajurur külenang tajungba melenshia ao ama, tawa Nagaland nung ULB election dak aketba maparen nung lendong timtem aser takoksa ajuruba ajanga Nagaland nung yimsüsürtem tali shisatakaba aser tajungba yimsüsüa otettsü imlar. Atangji, ano mapa matem asünungji, ashiko,  tamalen dang nungibo tamajungba tensa mapanga arutsüa akok, anungji nübortem rongnunga temetongshitsü aser tekümdangtsü kaji, government dang asenok jashibaji tulu asütsüa akok saka kechisüdirsüaka government kiojen nungbo mekongshitsüla. Kiojen merongdoktsüyonga aser meraksatsüyonga nübortem longjemer government-i yangluba ozüng aser sentong tamajung anema nokdaktsübaji lenmang aika lir. Government aliba agi nübortem alir masü saka nübortem aliba agiang government alir, anungji government meshitakra nübortemi government marakzüdaktsüi nokdangtsübaji tim dang lir. Iba tashiji nübortem dak lir. Government nung alirtemi iba tashiji tsübutsüla aser nübortemia pei dak aliba tashiji meteta political party apia masü saka pei lima, pei nübortem aser talisa tarutsü lanu putu asoshi bilema, kechi party ta masü kechi ochi aser kechi shitak ta asüba nung tanga aser tarutsü nunga nokdaktsüla.