Ano tebilemtsü ka !

Mozü kidang inyaker nursetem longkak aitba anener lia ano asüng July 21 nü nungi RMSA sentong kübok tesayur inyaktsü asoshi tezüluba tatidang nung takok ngur alir nisung 923 tashi agi July ita tashi nungsa anünga akaba tebang o tatidangjia agir teshimtsü pur shima mapa agütsütsüla ta takangba agüja longkak aittsü ta metetdaktsüba agi state sorkar asoshi tebilemtsü ano talila ka bendenlokogo. Atangji, alima asünungji mapa inyaker meinyakmar aser tebilemtsü ajurur majurumar, saka Nagaland nung ajuruba tebilemtsü yabo teimbaka alima asüba agi masü saka asenoki yangluba tebilemtsütem lir. Aji oda, asenoki asenoksasa yangluba tebilemtsütem rongnung tang RMSA candidate-temi ajuruba tebilemtsü ya ka asütsü. Parnok ya RMSA sentong kübok tesayur inyaktsü asoshi taoba 2014 küm May 24 anogo nung tezüluba tatidang agi aser iba result-jibo ita ka tsüngda June 29, 2015 nü agütsü. Iba tashijibo teinyaktsü purtemi shitak inyakogo. Ajisüaka, iba sülenji küm ka dak tali iba tatidang nung takok angurtemji tebang o agi tendangtsü aliba tatidangia maja aser teshima meshim ta toktsür külen, tang tesüsa parnok rongnunga B.Ed degree alirtem dang tebang agi tendangtsüba tatidangi jaokba agi B.Ed degree malirtemi parnok ashioktsü amai bilema longkak aittsü apusor. Atangji, parnoki ashiba agi, iba mapa atema tatidang agütsütsü sangdongba osang nungbo Bachelor degree alirtem ajaki agütsütettsü ta shia liasü. Aji oda, parnoki ashiba ama, tatidangji Bachelor degree alir mashi kati agütsütettsü ta shia lira, aser iba kasa jenjang nung tezüluba tatidang agütsüba nung takok ngua lira, tang ajungbena parnokji B.Ed degree alitsüla ta metetdaktsübaji tatidang agütsürtemji ashioktsür asütsü. Iba ama tebilemtsü adoktsüsa asenoki inyaktetbaji tetamatsüka aser angatettsü tasak ka lir. Ibaji ketdangsertemi RMSA inyakyim mangatet aser majitet inyak asü mesüra nisung kar akoksadaktsütsü aser kar jungdaktsütsü asoshi inyak ta bilemdangtsüsa adoker. Joko, RMSA candidate-temi parnok jashiba aser taginüba ajak shiadokogo aser parnoki akangba onüktemji mataloktsü tashi longkak aittsü ta metetdakja alinungji, RMSA ketdangsertemi nübortem dang parnoki inyakba kulitemji metetdaktsütsüla aser kechi tim aji inyaktsüla. Iba amajika mesüra Naga nunger lanur 923 ji kongi aotsü ? Parnok mapa angutsü imlaseta küm ka dak tali atadaktsübaji shibai menoktsü ? Iba tebilemtsü yagi ano asenok dang Naga lima nung ya asenoki yangluba tebilemtsü aika lir ya sayur. Lanur 923 ji aika. Parnokji mapa mangu nung kechi akümtsü (?) ta asüba tebilemtsüji tulu lir. Ajisüaka, sorkar nung alir ketdangpurtemibo tangar tanurtem asoshibo kangabo shisabolua mebilemer amai bilemer.Yimsüsür aser tulur aikati pei sorkar tenzükba menden nungi maludang, pei chir kabosa tezülen nungi asüyonga sorkar mapa nung anioktsütsü ta bilemer. Iba jagi tang ACAUT teloki Rural Development department nung temaba menden nung mena alirtemi pei chirnurtem kecha tatidang magii tezülen nungi mapa nung shimba anema ola adokba asenoki angashiogo . Aji oda, Nagaland nung talisa School Education department nung mapa inyakertembo ajak tatidang magi dang shimer aser mapa kar atema tatidang agira iba resultji kodanga mapang shitak nung magütsür. Iba jagi School Education department anema agütsüba ken o aika okadak bendena alitsü aser iba atema küm shia sen aser mapang aika endoker. Item ajakji alima asüba agi masü saka asenoki teinyaktsü mapa shitak meinyakba agi lir. Tanü sorkar nung khuret tulu abenertemi nübortem atema mebilem aser talisa lanurtem rongnung tajungba asütsü toktepa tatidang agütsüdaktsür, tajungba aser shitakba shima sorkari mapai meidaktsüra, Naga nunger lanur rongnung telok ana, takar aser tulur chinurtem o sensaker aser tilar chirtem na ta kümadoktsü. Aji oda, kodang lanurtem teimbaka mapa maka aser chiyongtsüa maka ta timtem tia ka nung lidir, item jagi pei taküma samaa metsübui temelenshi tajung ka atema nokdaktsü. Iba ama tia kaji ajurutsü asü (?) mesüra paidoktsü ta kanga süoki ia yimten yimsüsür aser ketdangsertemi bilema inyaktsü kanga tongtibang kümogo.