Anogo 10 nü Hornbill benjung amungtsü: Tourism Deptt

Kohima, November 6 (TYO): December 1 nungi tenzüka Naga Heritage village nung anogo 10 tashi Hornbill Festival amungtsü.
Mongulbar nü Tourism Directorate nung sendaktepa aliba department tem aser tribal hoho nungi teshimtet nübotem den senden ka amendang Tourism Joint Secretary M. Shayung Phom-i iba osang metetdaktsü.
Iba benjung takok ngua amungtsü atema tribal hoho temi pei tajungtiba agi shilem agitsü ayongzüker, ta Shayung-i senden nung ashi.
Benjungmung mapang Kisama ji ‘Plastic Free Zone’ ta sangoktsütsü, anungji tribal hoho ajaki anogo 10 benjung nung plastic mamshitsü atema osang tejangja sangdongtsü mepishir, ta paisa shisem.
Hornbill festival tenzükba ajanga Nagaland-i international aser domestic tourist tem teimba arur, ta Tourism Joint Secretary-isa metetdaktsü.
Senden nung Tourism Joint Director, Akhale Vizol-ia Hoho ajak dang pei pei morung tem merükmejua aser tiptema ayutsü ashi.
Laisa sobaliba sübotsü agitsü aser morung tem nung tobur junga yanglutsü indang osang metetdaktsü.
Taküm Hornbill benjung nung plastic aser polythene mamshidaktsütsü aser iba nungji mineral water bottle dena lir. Anungji, tarurtemi pei pei indang water bottle bener arutsüla, ta laisa shisem.
Laisa, paper cup, somo tou, aou marok, paper bag aser eco-friendly ausotem amshitsü ayongzük.
Art & Culture Department nungi Programme officer-ia anogoshi sentongtem nung kin 17 nungi nisung 600 shi kati shilem agitsü, ta osang metetdaktsü.
Sobaliba dak sendakba sentongtem dak alia artists corner, archive week alitsü aser tourist temi semdangtsü tesemtem rongnung World War-II Museum, Kisama aser State Museum, Kohima asütsü.
Department-i Hornbill benjung atema mapa kanga mazüngi dang inyakdar aser tribal hoho temia longjemer iba benjung takok ngudaktsütsü atema mapa inyaktsü ayongzükr, ta Assistant Director Veyielo Doulo-i senden nung ashi.