Anogo 104 sülen Darjeeling Hills mokdangba anen

New Delhi, September 26 (Agencies): Gorkha Janmukti Morcha (GJM)-i Darjeeling hills nung Gorkhaland state balaka tentettsü takhangba agüja anogo 104 lungkak aita aruba sülen tanü mokdangba anentsü telemtetba agi.
Mongulbarnü Home Minister Rajnath Singh-i Gorkha Janmukti Morcha (GJM) dang Darjeeling hills nung mokdangba anentsü mepishia metetdaktsü aser pai Union home secretary dang official-level senden ka jatepa iba dak sendakba onüktem lemsateptsü tetuyuba agütsü.
Democracy ka nung olemtep ajanga dang khurettem koktettsü aser aremzüka aser atasaa inyakba ajanga dang telemtetbatem agitettsü ta home minister Rajnath-i sangdong ka nung metetdaktsü.
“GJM aser parnok lennir Bimal Gurung nunger dang mokdangba anenang ta ni mepishir. Iba tesem nung tensa süngjemdaktsütsü aser talisa benjung mapang tensa jungdaktsütsü atema ni mepishir” ta paisa ashi.
Rajnath-isa Union Home Secretary Rajiv Gauba dang hopta ana tsüngda official-level senden jatepa Gorkhaland dak sendakba onüktem lemsateptsü tetuyuba agütsü.
“Mokdang tenzükba sülen tapuyutsü taküm 11 tashi samaogo, nisung tenet yiruogo aser Darjeeling hills nung alirtem ajaki timtem ajurua arur. Darjeeling hills nung tensa mejungi akümba atema ni temulung raksar,” ta paisa sangdong nung shisem.
Darjeeling hills nung Gorkhaland state balaka tentettsü takhangba agüja June 12 nungi GJM-i mokdangba sentong ketdangsüa aru.
September 20, 2017 nü West Bengal sorkari züngsem 9 agi akümba board of administrators shimba osang metetdaktsü. Iba telokji Bimal Gurung-i aniba Gorkhaland Territorial Administration (GTA) indang tashi den kasa asütsü.
Iba telok nung GJM züngsemtem Tamang (chairman) aser Anit Thapa (vice chairman) shim. Tena ya GJM nung temulung mesüi ola adokertem lir.
Hombarnü state sorkari Darjeeling aser Kalimpong nung internet services nokdanga aliba agienogo. Iba tenokdangba ya June 18, 2017 nü agüja liasü.