Anogo 12 Transformation Crusade temoatsü nung tembangogo

Dimapur, March 26 (TYO) : Deobar nikongtsütsü Kohima Local ground nung Transformation Crusade tembangba sentong kanga longsoa agiogo.
Tanü agiba sentong nung tongti o jembirji Rev. Zotuo Kiewhuo liasü aser pai o mejembidang, tamasa taoba mapang Tsüngrem akhümtsübua aliba ajanga NPSC tatidang nung takok tulu ngur alirtemi parnok indang taküm kuli lemsatepa liasü.
Rev. Zotuo Kiewhuo-i Tenüngsang Ken 37: 3 nungi agiteta NPSC tatitang agütsür alir aser agütsütsüpurtem ajak nem tayongzükba agütsü aser iba sülen parnok menden nungi nokdakdakja parnok asoshi telok ajaki bendanga agütsüba sarasadem ka agia liasü.
Iba sülen tongti o jembiri Rev. Zotuo-i onük jembidang, “Ibri 12: 2 nung shia aliba ama Yisui maaksü ajak arema kangkidong nung asen menen indoktsüogo. Anungji Pa dak rangloka aseni taremzük nung kati ka den aremzüktepba lia aotsüla” ta ayongzük.
Paisa, Yerimia 23: 1-4 nungi tesentepertem ajak ayongzüka liasü.
“Asenoki dang Tsüngrem nem bendanga agütsüra sayatenya tulu Pai asenok dak inyaktsü aser sarasadem ajanga tashitak tapu balala aika taneptsü angur” tongti o jembiri tayongzük agütsü.
“Yerimia 23:14 nungi ashiba agi, Yirusalem nung nüktapangta, tiyazü aser jabujari mapa tamajung inyaker ainkartem aika liasü. Item mapa Tsüngrem tsüngdang tesempatsü Sodom ama liasü. Item mapa nungi nüburtemi memeyip nung Tsüngrem kanga jashia liasü. Yamaji tanü asen lima nunga aika aliba aseni angur. Anungji kechi mapatem ajanga aseni Tsüngrem sentsüwangshi metongtsür itemji angateta Tsüngrem tsüngdang arua tatok meshia Tsüngrem den tesendaktep tasen yanglushitsüla” ta Rev. Zotuo-isa ayongzük.
Sentep tatem nung tongti o jembiri shirnoksa Tsüngrem nem pei taküm bendanga agütsüner aser shirnoksa shi aser Tanela nung taneptsü nüngdaker parnok ajak taka metongdakja tejakleni arudaktsü, iba sülen parnok asoshi sarasadem balaka agüja nisung aika shi aser tanela nung tanebtsü anguba telok nem kuli agüja liasü.
Taonung tashi nung nisung 250 shi ka temenen balala agi alener alirba Tsüngrem nungi taneptsü ngua liasü. Iba den mojing külemer aser mojing agi ameta alir parnok 50 tema Tsüngremi salatsü aser sentep shia shiranger aser taneptsü nüngdakbapur nisung aika nem teti asoshi Tsüngremi taneptsü agüja iba sentong ya kanga dang takok ngua agiogo.
Taonung tatembangba sentong nung ground tesadang ka tashi nung nisung meyirjang metsü tema sendena Tsüngrem külemogo.
Anogo 12 tashi ayongzükba Transformation Crusade nung, volunteer 300, counsellor parnok 100 tema, sarasademtsür telok 42 den iba sentong asoshi sarasademtsür parnok 429 tashi agi iba sentong takok asoshi yaritepa aruogo.