Anogo 15 buba petrol & diesel jenjang atur

New Delhi, Monupii (May) 28 (Agencies): Petrol aser diesel jenjang atuba khuret koktettsü atema sorkari inyakyim tasen ka shisadangdar ta Oil Minister Dharmendra Pradhan-i tanü metetdaktsü.
Ajisüaka, Pradhan-i kechi inyaktsüar mashi.
“Tesüiba mapang ni iba tebilemtsü atema aiben jembiogo. Tang totzü nung jenjang atuba ya onük asem ajanga lir. Mezüngbubaji international crude oil jenjang atuba, dollar aser India sen tsüngda tepila adokba aser tax indang onüktem ajanga lir” ta pai osangbener dang ashi.
“Sorkari iba tebilemtsü koktettsü atema sentong ka atongdar, iba nung petroleum products GST kübok dendaktsütsü onok dena lir” ta Pradhan-isa shisem.
Ajisüaka, sorkari excise duty ajema agitsü sentong ali asü mali’ar pai telangzüba kecha magütsü.
Tanü agi anogo 15 buba tashi petrol aser diesel jenjang ajungketogo aser tesüiba küm 5 tsüngda tang jenjang tasaktiba lir.
Karnataka nung assembly election agitsü aliba atema sorkar meyong totzü company temi anogo 19 tashi totzü jenjang nung mereprangshii aruba sülen Monupii (May) 14 nungi totzü jenjang atutsü tenzükba sülen tanü tashi nung Delhi nung petrol litre nung sen 3.64 aser diesel nung sen 3.24 tashi tuogo.
Petrol nung sen 2.65, diesel nung sen 2 ajemtsü koka lir: SBI Ecowrap
Tanü SBI report ka ajanga ashiba agi, state temi petrol litre nung sen 2.65 aser diesel nung 2 ajema kümdaktsütsü akok.
“Tang crude oil jenjang aser onoki state 19 asadangba ajanga state temi 2018-19 atema sen crore 18,728 shi tax saruzüker alitsü ta bushiteter” ta SBI indang Ecowrap report nung shia lir.
“Iba nungji ajemdaker state sorkar temi petrol litre nung sen 2.65 aser diesel nung sen 2 ajema kümtettsü” ta report nungsa shia lir.
Ano, state sorkartemi Centre indang tax jenjang nung mesüi base price nung dang VAT agira petrol litre nung sen 5.75 aser diesel nung sen 3.75 ajemtettsü, ta parnokisa ashi.
“Ajisüaka, iba amai inyakra state sorkari tax nung sen crore 34,627 shi akoksatsü. Ano külen Centre-i excise duty nung sen 1 ajemra, central excise nung sen 1 ajemba shia tax nung sen crore 10,725 akoksatsü” ta Ecowrap-isa metetdaktsü.