Anogo 17 Buba Tatar senden meliteter

Taküm Parliament tzüngluruwa senden July 21 nü tenzüka liasü aser August 13 nü tembangtsü, aji süaka Congress-i anir opposition Party temi ochimashi ken o nung densema alir BJP minister tem menden nungi aludaktsütsü takhangba agüja Parliament nung rongrong adokdaktsüba ajanga tanü (August 07) tashi senden nung Land Acquisition Bill aser Goods & Services Tax (GST) Bill densema Bill ka danga magizüki arudagi. Tawa Lok Sabha nung Congress Chief Whip aser MP, Jyotiraditya Scindia-i, “Ochimashi ken o tem nung shilem agia alir BJP minister tem parnok menden nungi maludaktsü tashi Parliament makatettsü. Item ken o tem nung Congress ajang-ajanga noktaka lir aser takhangba nungi matsüngshitsü. Senden junga kadaktsünüra sorkari mera kar agitsüla,” ta shiogo. Taoba mapang Deputy Ato kilonser aser BJP lenir tejen L.K. Advani-i, BJP ji tangatetba party tajung ka asütsüla ta jembiba o nung ajemdaker Scindia-isa, tamalen BJP lenir tejeni (Advani) tatishitsü sayua pa menden nungi aluogo, anungji tang BJP aser Ato kilonser Narendra Modi-i parnokji tangatetba tajung aliba party ka asü masü’ar sayutsüla, ta shiogo. Senden tenzükba anogo nungi Congress-i taoba mapang IPL mendenbuba Lalit Modi yariba ken o nung External Affairs Minister Sushma Swaraj aser Rajasthan Chief Minister Vasundhara Raje na aser Madhya Pradesh nung Vyapam ochimashi ken o nung Shivraj Singh Chouhan nunger menden nungi aludaktsütsüla ta akhanger. ‘Ochimashi ken o nung shilem agia alirtem tama menden nungi alutsüla, iba sülen ang ken o jembitsü’ ta asüba tangatetba ya BJP-i mezüng benoka liasü aser tamalen parnoki akhangba amaji inyaka aruogo, anungji tang Congress-ia Sushma, Raje aser Chouhan nunger minister menden nungi tama aludaktsütsüla, iba sülen ang ken o jembitsü ta tekong meranga noktakba ya tim dang, ta bilemer. Sorkar ajaki majority maongka agia tashi alia amshir, ano külen opposition party temia sorkar tashi meitdaktsütsü atema rongrong adokdaktsür. 1980s mapang Rajiv Gandhi Ato kilonser inyakdang-a Congress-i aiben majority maongka agia opposition ola madokdaktsüi liasü. Tawa Lok Sabha Speaker Sumitra Mahajan-i Congress MP 25 tashi anentsüba ama Rajiv’er mapang nunga Speaker Balram Jakhar-i opposition MP aika anenja liasü. Mapang ka nungbo Rajiv’er sorkar dang kanga mejungi jashioka Parliament nung MP 106 longjemer parnok sasa külemi anen. Rajiv Gandhi’er sorkari majority maongka agia tashi alia amshia opposition kanga mezüngmeshi, aser ibaji ajanga opposition party aika ka küma longjem, iba denji kasa tang BJP sorkari Congress MP 25 anentsüba ajanga opposition nung tsükchitepa aliba party tem- Left Party, TMC, SP, AAP aser JD (U) ka küma longjemer sorkar anema ola adoker. Parliament nung rongrong adokdakja lungkak aitba ya nübur meima ochi asoshi noktakba, tim masüba anema noktakba, pei temeten bushitepba, pei teyak-asangba, yimtenren nung mangyangtepba aser sorkar tashi meitdaktsütsü kulitem ajanga lir. Parliament nung lungkak aita rongrong adokba ya senotsü mesüra mapang laluba kijabo masü, kechiyong mapang ka ka nungbo mapang tatsüka lungkak aitba ajangaji teti asoshi tajangzük tulu bener arutsür. Tatishitsü tajung kaji- taoba Parliament senden nung Modi’er sorkari Land Acquisition Bill benoka iba Bill agizüktettsü asoshi parnoki tekong kanga meranga noktak saka opposition party temi iba Bill ya aluyimertem anemba Bill ka ta aija Bill nung ozüng aika anema lungkak aitba ajanga anogo aika senden junga mekateti süidakja liasü, ajisüaka tatem nungbo Modi’er sorkari iba bill yanglushitsü lemtet, aser tangbo iba bill ya tamalen UPA sorkari agizüka aliba den kasa kümogo. Taoba senden anogo aika mekateti süidaktsüba tajangzükji ibaji liasü. Aji oda tang-a anogo aika senden mekateti opposition party temi nungita Congress-i tekonga meranga ochimashi ken o nung shilem agia alir minister tem menden nungi aludaktsütsü akhangba aser sorkaria tekong meranga noktakba ya kechi koma ka tembangtsü (?) ta nüburtemi repranga atadar.