Anogo 21 atema India ajunga shibanger

New Delhi, March 24 (Agencies): Prime Minister Narendra Modi-i coronavirus anema raratsü atema taonung (Mongulbar) ayaterm nungi hopta asem kimai malutsü osang metetdaktsüogo.
“Taruba anogo 21 tsüngda ki toktsür kimai motsüla, mesüra nai nür kidangi virus anioktsü” ta PM Modi-i ashi.
“Taonung ayaterm nungi linük ajunga shibangtsü. Iba ya curfew ama asütsü aser Janata Curfew dang nugi tesashiba” ta paisa shisem.
“Anogo 21 nü shibangbaji mapang talang ka ama bilemtsü akok, saka iba jagi dang asenok ajak lendong nungi jenbutsü. Asenoki anogo 21 ji melitetra, asen linük, nür kibong küm 21 tesüleni alutsü” ta Modi-isa ashi.
Centre aser state temi tang nüngdakbatem peria angutsü atema mapa inyakdar aser sorkaria health infrastructure akangshitsü atema Rs 15,000 crore lemzükja lir, ta paisa metetdaktsü.
“Lokti nungi pilaa alitsübaji shiranger atema dang ta bilemer. Saka ibaji shitak masü. Nisung o nisung na pilaa aliba ajanga dang virus madak takok angutsü. Iba ya senso shia, kibong shia, züngsem shia aser Prime Minister atemaa lir” ta Modi-isa shisem.
Mongulbar nikongtsütsü 5:45 ako tashi nung India nung coronavirus aketer ajak agi 519 jungogo, ta Ministry of Health and Family Welfare-i metetdaktsü.
Parnok rongnungi nisung 470 ji ‘active cases’ aser 39 temang tajungba kümer mozü ki nungi anizükogo. Tang tashi nung coronavirus ajanga nisung 9 süogo, ta Ministry-isa ashi.