Anogo 28 tsüngda DHQ lenmangtem yanglutsü: Tongpang Ozukum

Kohima, Rongchii (April) 10 (TYO): People’s Democratic Alliance (PDA) sorkari taruba anogo 28 tsüngda district headquarter (DHQ) ajak nung gari lenmangtem yanglushitsü atema merangdar ta Public Works Department Minister, Tongpang Ozukum-i tanü ashi.
Tongpang Ozukum-i PWD minister inyaktsü tenzükba sülen tang mezüng atema osangbenertem den sensaksemdang, “Metsüremi (March) 8 nü PDA sorkar indang mezüngbuba cabinet senden amendang sorkar atema tongti teinyaktsütem rongnung gari lenmang ka asütsü lemtet aser Chief Minister Neiphiu Rio-i anogo 60 tsüngda district headquarter lenmang ajak yanglushitsü osang metetdaktsü” ta ashi.
“Anogo 60 nungi anogo 32 süiogo aser onok ket nung anogo 28 dang anünga lir saka onoki iba mapa inyaktsü atema merangdar aser yashi nungi gari lenmang yanglushitsü tenzükogo” ta paisa ashi.
“Naga nungertemi sorkar takang ka aser gari lenmang tajung mapang talangka aginüa arur, anungji PDA sorkari gari lenmangtem tajungba kümdaktsütsü atema temulung agütsür. Yashi nungi department-i mapa tenzükogo aser nübortem dang sangoktsüba alizüng tongtettsü atema merangdar” ta Tongpang-isa shisem.
PWD Minister aser taoba Naga Students’ Federation tiri state nung alirtem dang Department den yariteptsü atema mepishi.
Gari lenmang temesü aser traffic jam ajanga nübortemi timtem ajurutsü, ta paisa shisem.
District headquarter ajak nung gari lenmangtem yanglutsü asünung iba mapang colony aser ward tema amshitsü. Anungji colony aser ward ketdangsertem, civil society tem aser sendaka alirtem ajaki tzüngluruwa matongdangsa, taruba anogo 28 tsüngda mapatem tembanga inyaktettsü atema yariteptsü mepishir, ta Tongpang-isa metetdaktsü.
Kechiba mapa menur tenzüker ta osangbeneri asüngdangdang, “sorkar tasen ka asünung onok ket nung sen peria mali aser ano district kar nung aser talisa Mokokchung nung stone chips manguba khuret liasü. Ajakji liaka tongtipangbaji sen peria maliba ajanga metenzüktet” ta PWD minister-i langzü.
Iba mapang PWD Chief Engineer, Limadongdang Jamir-ia ashiba agi, department-i sen crore 102 endoka district headquarters 12 nung kilometer 2017 tasazük gari lenmangtem yanglutsü.
Iba atema sorkari sen crore 50 agütsütsü mulungogo aser mezüng shilem atema sen crore 25 agütsüogo, ta paisa metetdaktsü.
Mezüngbuba shilem nung district headquarters nung tongtipang lenmangtem yanglutsü aser talisa Kohima nung tali temulung agütsütsü, ta Limadongdang-isa ashi.
District headquarters nung kilometer 217 tasazük hari gari lenmangtem yanglushitsü atema department-i senotsü teyari meshitsü, ta paisa shisem.
Kohima aser Mokokchung district tem nung pai department ketdangser aser staff den ajurutepogo aser kobi melii Dimapur district nunga PWD department den ajuruteptsü, ta PWD Minister-i ashi.
Dimapur district nung aputem yangluba tonga oa semdangtsü aser tanga aputema reprangdangtsü, ta paisa shisem.
Department-i district headquarter lenmangtem yanglutsü saka iba atema department engineers, employees aser machineries amshitsü. Ajisüaka, mapa kar atema talisa bitumen mapatem nungbo sorkar contractor tem amshitsü akok, ta Tongpang-isa metetdaktsü.
2015 küm tzünglu kanga aruba ajanga Secretariat road nung aliba Sanuorü ayong apu raksa saka kechiba iba apu meyanglur ta asüngdangdang Chief Engineer-i “iba ya ali kibur tebilemtsü ajanga meyangluteti liasü. Ajisüaka, iba ken o angatettepogo aser sen crore 20 agi metre 20 apu ka yanglutsü” ta langzü.