Anogo 40 nü asentenshi, pezübuba sentep osang

Dimapur, June 04 (TYO) : Anogo 40 nü asentenshi pezübuba sentep nung o jembir, Spirit of Faith Arogo nung Pastor John Roughton kinungtsü Pastor Zepitoli Roughton-i, “Asentenshi ta asübaji ‘Tanela Asüngsashiba’ dang ajar kechiba süra asenoki Tanela tasü maginer,” ta ashi.
Lai, tang putu tendak aliba nüburtem ya Tanela agi sünga aliba dang masü saka Tanela tesayuba tajung agi sünga lir aser ibaji ajanga iba asentenshi milak ya tarutsü pututem tashi belenoka yutsütettsü, ta ashi.
Kodanga maremba Milak dak amangang. Iba Tanelar Milak ya meremsepi tarutsü putu nem belenokja asen lima süngdakjang. Tsüngremi asen lima ano khen moatsüba asenoki nguner,” ta lai shisem.
“Tsüngrem Sentsüwangshi anginera asenoki Pa atema ya-a tzüratsüla,” ta lai sentepa alirtem ayongzük.
June 1, 2016 nü nungi tenzüka tang tagidak aliba anogo 40 nü asentenshi sentong nung tamanger tanur aser tain jenti arua dendar. Asen lima nung asentenshi tulu arutsü tamang nung nüburtemi iba sentong nung jangraseta adener.
Sentong tasembuba nung taneptsü anguba aser temenen talenba nungi salar tekümtet anguba kuli lir.
Iba asentenshi sentong ayongertemi osangkaket ‘Fire Mail’ ananü nung khen adokdar aser iba osangkaket nung tashidak ajungba aser tanela kümzükba kulitem angutsü. Iba den külemi asen lima aser bendanglen tesüiba mapang o tang tensa tamangertem atishitepba osanga angutsü.