Anogo 40 nü asentenshi sentong tembangogo

Deobarnü DDSC Stadium nung Anogo 40 nü Asentenshi sentong tembangba anogo Faith Harvest Church Pastor, Rev Shan Kikon-i o jembidang agiba noksa ka angur.

Dimapur, July 10 (TYO) : July 10, 2016 nü DDSC Stadium, Dimapur nung anogo 40 nü amongba asentenshi sentong tatembangba nung lanur aser tain meyirjang aika arua aden.
Asentenshi sentong tatembangnü Grace Covenant Church nung Sannüker Khriesito Z. Savino-i tayongzükba o jembi aser Faith Harvest Church, Kohima nung Sannüker Rev Shan Kikon-i Tsüngrem O nungi jembi.
Tali Angh-i yangluba iba asentenshi sentong naklu ken, “I’m A Revivalist” indang music video kasa sentong nung Rev. Shan Kikon-i moaja sayatsü. Iba naklu ken ya Heidi Baker, missionary, Iris Global-i anogo ana tsüngda nung YouTube nung inokja alima ajak nung sayatsü.
Anogo 40 nü asentenshi sentong ya June 01, 2016 nü nungi tenzüka Life Spring Corner, Dimapur nung July 03, 2016 tashi agi aser iba sülen July 04, 2016 nü nungi tanü July 10, 2016 nü tashi maneni DDSC Stadium nung agiyonga arua tembanger.
Iba asentenshi sentong ya 1976 küm Nagaland nung asentenshi atalokba sülen küm 40 ajungba nüngtem nung Sinai Ministry-i ayong aser Arogo balala nungi lanur aser Tsüngrem lartemi shilem tajung agiogo.
Iba asentenshi sentong ya ‘Redigging the Well’ omen nung ajemdaker among.
Asentenshi sentong nung Tsüngrem O jembirtemji Rev. Shan Kikon den ano Alemsunep Jamir (Pastor, WICC), Rev. Robert Kikon (Pastor, Father’s House Church), Lipok Phom (Potters’ House), Visasier Kevichusa (Pastor, Kingdom Culture Church), Rev. Dr. Shewoto Assumi (Senior Pastor, NCRC Sumi, Purana Bazaar), Rev. Kilang Jamir (Youth Harvest Ministry), Reverend Moses Murry (General Superintendent, AGEI), Kenie Kiso (Life Square Church), Among Lemur (Let’s Go Ministry), Mrs. Phutoli Shikhu Chingmak (Managing Director, ECS), Zhepitoli Roughton (Pastor, Spirit of Faith Church), Mrs Alongla Aier, Jack Pucho (The Warehouse Worship Resource School), Wabang Longchari (Director, Sinai Ministry), Meren Jamir (Administrator, Sinai Ministry), Dina Ross Longchari (Sinai Ministry), aser Kumtila Subo nungeria liasü.
Iba asentenshi sentong ayongertemi iba sentong indang osangkaket ‘Fire Mail’ adoka liasü aser iba osangkaket ajanga tesüiba mapang Nagaland nung asentenshi adokba otsüa lemsatep. ‘Fire Mail’ osangkaket ya ‘The Morung Express’ osangkaket den lokteper lemtsüa liasü.