Anogo 45 tsüngda Zarü project tembangtsü

Dimapur, Rongchii (April) 17 (TYO): Rongchii (April) 17, 2018 nü PHED Minister, Jacob Zhimomi-i Mima yimtsüng nungi Kohima jilai tzü bener arutsü atema mapa inyakba tesem semdang.
Urban Ministry kübok Kohima Town (Zarü project) nungi water supply ji anogo 45 tsüngda mapa küma tenzüktsü. Iba ya PDA sorkari anogo 100 tsüngda inyaktsü ta asüba sentong kübok lir, ta tanü Jacob Zhimomi-i metetdaktsü.
Iba mapatong ya Smart City plan kübok shilem ka lir aser Kohima jila nung alir nem tajemtsü tzü tajung agütsütsü. Sorkari nübortem temang anema alibaren atema süoki ia bilemer aser iba mapatong yagi tajemtsü tzü tajung agütsüba dang masü saka Kohima nung tzü peria manguba khuret koktettsü, ta paisa ashi.
Wokha nung kasa mapatong ya anogo 45 tsüngda tenzüktsü. Rural area atema Chiephobozou RD block kübok Chiephobozou RD block nung iba mapatong joko tembanga inyakdar aser iba ajanga tzü peria manguba yimtsüng 21 ayimjemtsü. Kobi melii tanga district tem nunga iba mapatong tenzüktsü, ta PHED Minister-isa shisem.