Anogo 5 ayong benjung tembangogo, B’putra tarokba küma atutsü renem

Guwahati, April 05 (Agencies): Alima nung ayong tulu rongnung jenjang pezübuba nung aliba Brahmaputra ayong nung anogo pongunü tashi Namami Brahmaputra benjung tembangogo. Iba benjungmong nung Assam sorkar, Inland Waterways Authority of India (IWAI) aser National Highways Authority of India (NHAI) tsüngda tezüngzüktep ka Mongolbarnü agi.
Iba tezüngzüktep ya Union Minister for Road transport, Hihgways & Shipping, Nitin Gadkari, Chief Minister, Sarbananda Sonowal, state Industries Minister, Chandra Mohan Patowary, ketdangsertem aser legislator tem densema lia agi. Iba sentong nung Manipur Chief Minister, N Biren Singh-a densema liasü.
“Brahmaputra ayong nung rong tulutem senzütettsü asoshi iba ayong ya tarokba küma atutsü aser iba ayong nungi tutetba lisem ya Brahmaputra ayung anütsülen highway yangluba nung amshitsü asoshi iba tezüngzüktep nung zülua lir,” ta Gadkari-i ashi.
Brahmaputra ayong tasazük kilometre 841-shi tarokba kümdaktsütsü aser iba ayong nungi agitetba lisem ya highway kilometre 1300 yangluba nung amshitsü. Anüdoklen Sadiya tesem nungi anülulen Dhubri tashi kilometre 891 Brahmaputra ayong ya ‘National Waterway (NW) 2’ ta sangdonga lir.
“Assam rongsenkettsüng tajungba kümdaktsütsü asoshi Brahmaputra-i tongti shilem agir. Ayong nung rong tulu senzütettsüsa yangluba ajanga lenmangtem nung oset balala tanga linüktem nungi bener aruba mapang indokba senotsü tang tajemba kümdaktsütsü. Iba ayong ajanga raliwalir senzüba agi state indang rongsenkettsüng tajungba kümdaktsütsü. Onoki iba ayong nung kiojen yanglu tenzükogo,” ta Gadkari-isa ashi.
Iba benjungmong sentong metenzükdang, Gadkari-i ayong nung kiojen yanglubatem repranga jaja aser senden ka amen. Centre sorkari Bangladesh sorkar dang Chittagong nung aliba Brahmaputra ayong atutsü asoshi temelaba meshitsü asoshi iba senden nung lemtet.
“Iba sentong ya renemba sülen NW2 ya Bangladesh nung aliba Chittagong port, West Bengal nung aliba Haldia port den sendakteptsü aser ibaji ajanga Southeast Asia linüktem den shishilembaba tali tajungba akümtsü,” ta Union Minister-isa ashi.
“Tang Guwahati mekena senzüba Khanapara-Jalukbari lenmang ya six-lane highway kümdaktsütsü,” ta paisa ashi.
“Kin balala aser tamangba yimsü balala süaka ka küma longjemer iba benjung nung shilem agi. Iba benjung ajanga Assam tali tebur jungdaktsütsü asoshi tashi agütsür. Iba benjungmong takokma nung mongtetba asoshi nüburtem dang kanga pelar,” ta Sonowal-i ashi.
“Ozüng alema Assam nung arua aliba tebilemtsü ya kanga tulu lir. Iba maparen nung asenok ajungai Assam yaritsüla. Aji mesüra danga tesemtem nung iba ajanga tebilemtsü tulu bener arutsütsü,” ta Biren Singh-ia iba sentong nung ashi.