Anogo ananü GPRN senden kaogo

Dimapur, March 24 (TYO): Government of the People’s Republic of Nagalim (GPRN) anogo ananü senden March 23-24 anogotem nung Council Headquarters, Hebron nung kaogo; Speaker, Wb. Ashiho Asoumai Chairman ser senden nung 2017-2018 küm atema benokba budget nung o lemtepa liasü, ta tan MIP/Hebron sangdong ka ajanga metetdaktsü.
Mezüngbuba anogo senden nung Keya Ministry-i asürtem osang metetdaktsü, aser linük atema taküm bendanga agüja asürtem bilemteta minute ka ola madoki sarasadema liasü.
Presidential address nung GPRN Vice President, Gen.(Retd) Kholi-i, “Linük aser telok tenzükba nung meimchir tashi asoshi linük rongsenkettsüng nüngdak kümogo. Rongsenkettsüng jenjang junga aliba tetezü, sorkar inyakyim ajak nung nüngdakba senotsü maneni anguba lir. Anungji senotsü arubatem timi amshitsü atema budget junga renemtsü aser inyakyim shitak inyaktsübaji asen tebilemtsü lir,” ta paisa ashi.
Anogo ananübuba senden Vote on Account agi tenzü aser 2017-2018 küm atema Chaplee Affairs kilonser, Medo Angami-i budget benok, aser iba nungi o lemtepba sülen house-i agizük. Senden nungsa linük atema tongtibang onüktem nung o lemtepa liasü, ta sangdong nungsa shia lir.