Anogo asem tsüngda SpaceX ajanga Rocket ana yok

California, June 26 (Agencies): SpaceX ajanga anogo asem tsüngda rocket ana anünglaki yokteta otsü tasen yangluogo, ta osang ajanga ashi.
Florida nung aliba Kennedy Space Centre nungi Hokulbarnü osang ola bentepba satellite ka anünglak-i yokba sülen California nung aliba Vendenberg Air Force Base nungi Deobarnü tanabuba satellite ya yok, ta kasa osang ajanga ashi.
Deobarnü yokba ajanga taküm SpaceX indang satellite 9buba anünglaki yoktetogo aser 2016 küm yanglua aliba otsü yanglushi.
Rocket ka nung satellite tem inoker Deobarnü yokba ya anünglak nung aliba Iridium company nem agütsütsü.
Iridium Next indang nükjidong aika lir aser item rongnung tongtibangtibaji tayimtsütem track mesütettsüsa kümdaktsüba ‘black zones’ nung mapa balala inyaka tayimtsütem ngutettsü maparen ya lir.
Taruba küm Iridium Next mission trok yoktsü, ta osang ajanga ashi.
Hokulbarnü SpaceX ajanga anünglaki rocket yokba mapang ‘first-stage rocket booster’ ya tanaben amshi. Iba booster ya January nung khen amshir liasü.
SpaceX company kisüngi alima nung rocket ka anaben tashi amshir. SpaceX indang ‘first-stage rocket’ mesüra ‘droneship’ ya 13ben alima nung tanaben alua jungjunga anendakja lir.