Anogo asembuba nung nomination ka danga mali Political party temi candidate shimtsü inyakteper

Kohima, Tsüklai 3 (TYO): 13 buba Nagaland Legislative Assembly indang election Aenjeti 27 nü agitsü lir aser iba atema nomination asütsü tenzüker anogo asembuba nung nisung shingaia nomination masü süiogo.
Iba osang ya Chief Electoral Officer Nagaland, Abhijit Sinha-i metetdaktsü.
Election magidang Naga yimten atema telemtetba ka agitsü takhangba aser ano Aenjeti 29 nü political party temi election nung shilem magitsü atema joint declaration ka agüja liasü saka yashi BJP-i election nung tokteptsü telemtetba agiba ajanga iba telemtetba nung tetsükdaktsü ka ajuruogo.
Aenjeti 29 nü külem sangdong agütsüba nung mopung aiba sülen Naga People’s Front (NPF) aser Nagaland Pradesh Congress Committee-i candidate tem shimtsü mapa tenzükogo.
BJP dak alia Nagaland nung political party kati danga official sangdong magütsü lir saka party kati danga nomination süra parnoka asütsü renema lir ta osang angazüker.
BJP ya NPF den teyariteper ka lir saka parnoki candidate ano tatem küma meshim lir aser telok anaprongi züngsem 60 agi akümba assembly nung menden lemsatsü atema tatembang telemtetba ka magi lir.
Party lennirtemi national lennirtemi candidate shimtsü atema mapa inyakdar aser NPF dena menden lemsatsü atema jembitepdar, ta BJP Nagaland Unit Media Cell Convener, K James Vizo-i ashi.
Rajya Sabha aser NPF secretary general K G Kenye-ia ashiba agi, party-i NPF President Dr Shurhozelie Liezietsu aser Chief Minister T R Zeliang na nem candidate shimtsü aser BJP den menden lemsatsü atema tashi agütsüogo.
“Naga NGOs aser political party ajaki election magitsü atema obang kati marutetra, NPF-i recognized political party ka ama taruba general elections nung shilem agitsü. Ajisüaka tesüiba nung ama NPF-i Naga yimten tebilemtsü atema nangzüka aliba ama inyaktsü” ta tanü NPF Press Bureau sangdong ka nung metetdaktsü.
Külen, NPCC Secretary Moa Imchen-ia ashiba agi, “Congress candidate asütsü shimtetba mezüngba tenüng tarensenji All India Congress Committee-i agizükogo saka party-i election nung shilem magitsü ta nangzükba ama noktaka lir. Ajisüaka, tanga party kari danga nomination süra Congress-ia asütsü.”
Taruba assembly election nung Nationalist Democratic Progressive Party (NDPP)ia tongti shilem agitsü renema lir aser parnok indang chief ministerial candidate ji asemben tashi Chief Minister inyakba Neiphiu Rio lir.
Yimsüsür tejentemi dang pusemba masü saka NDPP nung mapa nungi anisüngzükba sorkar ketdangsertem dena lir aser NPF toktsür MLA 10 shi parnok den denogo.
“Onoki election nung tokteptsü atema renema lir, saka ajakji tanga party temi nomination asüba dak dang keta lir” ta NDPP Working President Nuzota Swuro-i osangbener dang ashi.
Constituency ajak nungi nisungtemi party ticket meshir saka party-i asüng ang menden kwi nungi tokteptsü’ar telemtetba agitsü, ta Swuro-i ashi.
Ano, JD(U) Nagaland convener Senchumo NSN Lotha-ia ashiba agi, tangari nomination süra par party-ia menden 10 shi ka nung tokteptsü renema lir.
Taruba Nagaland assembly election nung tokteptsü atema renema aliba party temji- National People’s Party, Aam Aadmi Party, Lok Jan Party, Nagaland Congress, United Naga Democratic Party, Nationalist Congress Party aser Republican Party of India lir.
Tanü Core Committee of Nagaland Tribal Hoho and Civil Organisation-i tongti kin hoho aser civil society telok nung tirtem aser ketdangpurtem dang asüngnep 11:00 ako nung Hotel Japfu nung ayongba senden nung arua adentsü metetdaktsü.