Anogo ka nung nisung lakh 80 tema nem vaccine agütsüogo

New Delhi, June 21, 2021 (Agencies): Centre sorkari India nung vaccine inyakyim tasen tenzükba mezüng anogo nung otsü tasen ka yangluogo.
Tesüiba ghonda 24 tsüngda India nung COVID-19 vaccine dose lakh 80 tema agütsüogo.
CoWin website nung taonung 8:30 ako tashi nung vaccine dose 8,096,417 agütsüba shia lir.
“Tanü nisung aika nem vaccine agütsüba atema pelar. COVID-19 anema rara nung vaccine ya hadir tajungtiba lir. Vaccine agir ajak aser front-line workers nem tenüngsang agütsür. India-i mapa tajung inyakogo” ta Prime Minister Narendra Modi-i metetdaktsü.
Centre sorkari tanü nungi arishi küm 18 ser temapur ajak nem vaccine angati agütsütsü tenzük aser state sorkartem ket nungi vaccine agütsüba tashi meyipa agiogo.
Centre-i company tem dang nungi vaccine 75% alizüktsü aser iba nung state sorkartem nem 25% lemzüktsüba dena lir. Ajisüaka, nija mozü kitemi tanüngba 25% alizüktsü akok aser sen yong vaccine agütsütsü.
India nung anogo ka nung vaccine timtiba agütsübaji April 2, 2021 nü nisung 42,65,157 nem agütsüba liasü saka tanü ibaji ajangtetogo.
“Tanü nungi Centre-i India nunger shia atema ‘Free Vaccination For All campaign’ tenzüker. Iba campaign nung tajangzük tulutiba angurtemji sensakertem, middle class aser lanurtem asütsü. Asenok ajaki vaccine agitsü tenangzükba agidi aser asenok longjemer COVID-19 madak takok ngudi” ta tanü PM Modi-isa metetdakja liasü.