Anogo shi osangkaket

Nagaland nung anogo shia adokba mezüng osangkaket ‘Nagaland Post’ adoker küm 25 ajungba sentong ka yashi agiogo. Iba sentong nung yimozülur Geoffery Yadeni taoba küm 25 tashi timtem lendong aser makamait ajak kokteta osangkaket adokteta aruba asoshi Tsüngrem nem tenüngsang agütsü aser teyariteper aser tazüngertem ajak dang pelaba metetdaktsü. Nagaland kümerbo joko küm 50 dak tali süir saka Nagaland nung anogo shi osangkaket adokerbo tangang küm 25 ajungba jagi Nagaland state aienba jenjang ka sayur. Küm 25 jakdanga, Nagaland nung computer m ali asü aser printing press nung nisung teka agi ojang ajak medema tarensena yanglur külenang menüngtsübaji mapa tasak liasü. Aji oda, osangbendena teka agi zülur külenang ano aji type writer nung ajentsü aser ibaji ajizüka zülujang ajak medema yanglutsübaji mapang kanga agia inyaktsüba mapa liasü. Item mapaji azümasener mapa masü aser pei kija asoshi senotsü tajangzük bushia inyakba agi takok ngua inyaktsüba mapa masü. Ajisüaka, pei nübortem nem osangtsüsang metetdaktsünüba aser tangatetba tajung agüja pei lima aser lokti jungdaktsünüba tejangraba tanüla agidang anogo shi adokba osangkaket adokteta inyaktettsü. Iba tangatetba tanülaji Geoffery dak liasü. Tangbo senotsü agibo timmedemi alitsüa akok saka Nagaland Post ya akhidang yangluba printing press tejen ka alia tenzükba takok otsü ka lir. Iba osangkaket yimozüluri pa kibur ka ama masü saka paa pa kübok inyaker ka ama anüngdang tesem balala nung osangtsüsang bendena senzütsü aser aji bendena aonung menünger külen pa gari ambassador tejen ka nung tananep aji lemaa senzütsü ta tenzükba otsüji Nagaland Post otsü lir. Tanübo iba osangkaket ya color nung tapak tuluba aser teimba nung adoker. Aji oda, Nagaland nung osangkakettem ajak ajateta inyaktetba takokji tenüng asangtsü tetemsü. Iba takok osang ya Nagaland nung Naga nunger asoshi Aor chanui inyaktetba takoktem rongnung takok ka asütsü. Tang tashi nung Nagaland nung anogo shi adokba English osangkaket pezü lir aser item pezü rongnung ka dak alaka asembo Aotsür-Aortemi adokba osangkakettem lir. Iba jagi, asenok dak tamajung aser tashimait aika liaka, ano tang tashi Nagaland nung Naga nungertem rongnung Aorsa temerangba, temetetba aser tajungba inyaker ta sayur. Anogo shia osangkaket adokba mapa ya temela masü. Iba mapa asoshi shisatsü aser temetetba kanga alitsü nüngdakba dang masü saka taremzük kanga nüngdaker. Osangkaket adokertembo kinungertem den külemi chiyongtsü aser mejangtsü mapang mangur, anungji kinunger aser medemertem den kazüa senzütsübo otsü maka. Item ajakji nübortem asoshi tenla asütsü. Iba amaji ka masü saka mapa temela asünungbo tangartemiang tajungba inyaktetla ta bilemer. Atangji, tanübo osangtsüsang ajak osangkaket nung madokdang mesüra tonga marudang, television aser internet nung ngur meteter alir, anungji aikati osangkaket azüngtsü mejangrar. Ajisüaka, osangkaket azüngba nungi osangtsüsang metetba dang masü saka tezülur balala nungi onük balala shisalemsatepba azüngba nungi tazüngertem shisa renlokbaji kecha dena medemdangtsü makokba tajangzük lir. Aji oda, tanü tsüraburtemi pei chinurtem dang osangkakettem azüngtsü ajungshitsübaji kanga tongtibang lir. Osangkaket azüngba ajanga tanga nüngdakba kakettema azüngtsü jangratsü aser tashitemetet nung aeinbaji balaka asütsü. Tanü asen loktiliba nung kaket azüngba kanga ajema kümogo, iba jagi asenok shisa mainer. Aji oda, asenoki asen lima tajungba küma yanglushinüra aser nübortem jenjang ajungkettsünüra osangkakettem dang masü saka kaket azüngtsü ajungshiteptsübaji kanga nüngdak kümogo. Ajak dak alaka, Tsüngremi ashiba ama, inyaker dang chiyongba aser meranga inyaker anguba aser akaba temoatsü lemsatepertemji Nagaland nung Aor asütsüla. Ibaji Aortemi Nagaland nung anogo shi osangkaket takok ngua adokba mapa agi kuli ka agütsür. Meranga inyaker nübortem yaribaji Ao kin temaitsü aser ayak asütsü tim.