Anogo shia nisung 40,000-i dang Taj Mahal semdangtettsü

New Delhi, January 03 (Agencies): Agra nung aliba nüngtugu kiojen, Taj Mahal wazüka ayutsü atema anogo shia raliwalir 40,000-i dang Taj Mahal semdangtsü atema lateta ayutsü lemtetogo.
Taj Mahal wazüka ayutsü aser iba tesem temekettem junga anepalutsü atema anogoshia nisung telatet kati dang Taj Mahal semdangtsü asoshi Archeological Survey of India-i lemtetogo.
Tawa Culture Secretary, Ravindra Singh leniba nung Archeological Survey of India-i Agra district administration nungi züngsemtem aser Central Industrial Security Force nungi ketdangsertem den senden ka mena liasü, aser iba mapang nung tebilemba onüktem süoka jembitepa liasü.
Taj Mahal semdangtsü atema anogoshia offline mesüra online ajanga ticket telatet ka dang ayoktsü atema jembiogo.
Ano külen ASI-i arishi küm 15 ser tekübokpurtem nem “zero-value” tickets agütsütsü atema lemtet, aser parnok dang nungibo sen magitsü.
Tang tashi nungbo anogoshia nisung kwitaki Taj Mahal semdangnüdir semdangdaktsür. Khenkhenbo anogo ka nung nisung 70,000 dak temai Taj Mahal semdangdar.
Mughal yimli mapang yangluba kiojen tajungtiba rongnung Taj Mahal densema lir, ta züngshir. 1983 küm iba ya UNESCO World Heritage Site ka ama züngoka liasü.