Anogo shia taküm Pa adenba – Yohan 15:4-10

Atangji alima matem tashi, Ni nenok den teti tena lir. Mathi 28:20

Tanü aser alima matem tashi Yisu den jajatsübaji takoktsü asü? Asenoki Pa den dokan nung, office nung, kidang, yimdong nung Pa den jajatsü akok asü? Kodang timtem arudir aser asen mapa nung terakasa adokdir idangjia asenoki Yisu den jajatsü akok asü ?
Telangzübaji temulung doka au. Yisu teti asenok den adentsü asenok kinüki aotsü mesüra tesülen atsüngzüka alitsü menüngdak. Pai Nazareth lemang aser dokan metet aser asenok tekümtet kangki Yirusalem nung apur jaja. Pai asenok lemang aser asenoki inyakba metet. Parnoki atitangba Pai metet. Pai parnok ola aser teratet metet. Pai parnoki bener aruba tebilemtsütem metet. Pa O aser Kibubai melaba mapa nung ammang tammang ajanga Pai asenok anasai anir arur.
Taküm nung timtem ajanga aser anogo shia ajuruba nung tamakok alura asenok tamang idakji tatem makümer, kechiaser tatidangba aser tejashi tulu ajanga asen Kibubai tashi tulu agütsür. Saka ano office nung timtem, dokan nung mesüra kidang anogoshia tebilemtsütem bentettsü Pai tesüngjem tamang agütsür. Pa teti asenok den dena lir, tashi tait Kümtetdakba ka, temulung lemtsü tembar ka, mapa nung aser kidang temeim medemer ka.
Kibuba Yisu, Na teti anasa aser ozü nüngdak ajak nung yaritsü renema aliba asoshi Ne tenüng asanger. Na teti onok den tena aliba metettsü onok dang yariang. Idangji Ne taochi ain ajanga onoki teti Ne den jajatsü. Amen.