Anogoshia entsü ka achiba ajanga temulungjang tashidak agi atongtsü aliba nungi jenboa lidaktsür

China nung bushisüngdang tasen ka ajanga ngutetba agi, anogo shia entsü ka achiba ajanga cardiovascular tashidak adoktsü aliba tajemba kümdaktsütsü. Bushisüngdang ajanga anogo shia entsü achirtem cardiovascular tashidak agi atontgtsü shilem 18 agi tajemba aliba ngutetogo. Iba bushisüngdang ya journal Heart nung adokja liasü.
Taoba mapang nung doctor temi patient tem dang entsü tali machitsü tetuyuba agüja liasü, kechiyong protein aser tanga nutritional components tem ketaka entsü nung cholesterol aika lir aser iba ya temang asoshi majung.
Ajisüaka iba bushisüngdang co-author Canqing Yu-i ashiba agi, entsü aser cardiovascular tashidak na tsüngda tesendaktep indang ya kangabo mejangja kechiyong sample ishira aser osanga kanga ajema lir.
Taoba mapang nung China nunger dak nungi kuli kar dang nguteta lir, shirnok achiajemba yimya, libaliro aser tashidak yimya balala lir. ta Yu-i ashi.
Item kulitem ajanga parnoki entsü achiba aser cardiovascular tashidak tsüngda tesendaktep indang bushisüngdangtsü lemtet. Parnoki ngutetba agi, arishi küm 30 nungi 79 tsüngda alir nisung taintem shilem 13-i anogo nung entsü kaka achir aser shilem 9-i entsü kodanga mesera kangabo sapua machiba ngutet. Iba bushisüngdang nung shilem agir timbakati an aser batak entsü achiba ngutetogo, ta Yu-isa shisem.
Busihsüngdangertemi küm teku dak tema item nisungtem asadanga liasü. Yu-i ashiba agi, China nung cardiovascular tashidak ajanga nisung timba asür, koba asür tesadangka asütsü.
“Stroke rongnung haemorrhagic aser ischemic stroke densema lir aser iba ajanga nisung ka anojungi südaktsür aser iba sülen ischemic heart disease lir,” ta Yu-i ashi. Bushisüngdang mapang parnok ngutetba agi, anogoshia entsü achiba ajanga entsü machir dang nungi temulungjang tashidak balala agi atongtsü aliba risk tajemba kümdaktsüba ngutet.
Anogo shia entsü achirtem haemorrhagic stroke agi atongtsü shilem 26 agi tajemba kümdaktsür, koba United States dang nungi China nung kanga bulua ataloker. Iba den bendenloksema entsü achirtem tanga stroke agi atongtsü aliba shilem 28 agi tajemba kümdaktsür. Tatem nung entsü achirtem ischemic heart disease agi atongtsü aliba shilem 12 agi tajemba kümdaktsür.