Anojungi gari aniba nokdangtsü atema Centre-i Bill benoktsü

New Delhi, April 26 (Agencies): Arishi küm agi mabensa ser nung anojungi tanurtemi gari aniba nokdangtsü aser iba ozüng alema aibelener tsüraburtem nem temerenshi agütsütsü atema Centre sorkari Bill tasen ka renemdar.
Küm agi mabensa ser nung tanurtemi gari aniba tsüraburtem nem temerenshi agütsütsü atema iba Bill ajanga ozüngtem latettsü.
Union Transport Minister, Nitin Gadkari-i tashi agüja iba bill renemtsü atema Rajasthan Transport Minister, Yunus Khan mendenbuba ser committee ka tentetogo. Iba committee nung state ajak nungi transport minister züngsem asütsü, aser iba committee-i anogo 15 tsüngda osang agütsüba sülen iba bill tatembangsüa renemtsü.
Deobarnü Gadkari-i, linük nung gari lendong atalokbatem shilem 50 ajema akümtsü atema mera balala agia merangdar, ta metetdakja liasü.
Iba dak sentakba nung Union transport Minister Gadkari-i, taküm kümzüktsü atema sorkari gari lenmang yanglushiba densema gari lenmang tajungba akümtsü aser gari lenmang nung longku tajemba akümtsü atema inyaker, ta ashi.
“Gari lendong aser nisung jenti yiruba-asüba linük rongnung India linük densema lir. Iba ya koktettsü atema ministry-i national highway tem nung lendong bulua atalokba tesem 2500 dak tema ajiteta lir,” ta paisa metetdaktsü.
“Tang linük nung kümshia gari lendong lakh 5 shi ataloker, aser item lendong nungi nisung lakh 1.5 shi asür. Iba nükjidong ya taruba küm 5 tsüngda gari lendong shilem 50 ajema kümdaktsütsü atema lir,” ta Union minister-isa shisem.