ANPSA Dimapur-i teyari agütsü

Dimapur, Monupii/May 17 (TYO): COVID-19 tashidak pokteter aliba ajanga linük ajunga mokdanger aliba mapang ‘Each One, Reach One’ omen nung ajemkadaker Nagaland Private Schools’ Association (ANPSA) Dimapur-i May 16 nü Dimapur District temeket nung parnok kübok züngoksema aliba School tem nem jang aser amtsük tenla agütsüogo. State mokdanga aliba ajanga private school tem timba senotsü tsütsü timtem nung aliba angateta iba teyari mapa inyakogo.
May 16 nü sarasadem mapang tatsüka agiba sülen tir Dr. Andrew Ahoto Sema den sanen luden züngsemtem kari Chumukedima Sub-Unit densema zone 7 In-charge tem nem jang juli 300 aser amtsük carton 100 shi lema agütsüogo. Item osettem ya maneni in-charge temi school tem nem lema agütsütsü. Maneni ANPSA sanen ludeni private school ajak dang temulung matemtsü aser school ajak longjemer takok tashi kati ka nongita yariteptsü ayongzük.