ANSCU-i pelaba sangdonger

Dimapur, June 03 (TYO): Degree tatidang osang June 02, 2017 nü sangdongtettsüsa kanga meranga inyakba atema Nagaland University Vice Chancellor, Prof. Pradeshi La aser Controller of examination (COE), NU, Dr. Abemo na den Examination Branch staff ajak dang pelaba metetdaktsür, ta All Nagaland College Students Union (ANCSU) Acting President, Temjennungsang Jamir aser Education Secretary, Viranu Ltu nati tanü sangdong ka nung metetdaktsü.
Semester examination tembangba sülen anogo 42buba nung iba osang sangdongba ya Nagaland University putiotsü nung tang tekaraba degree osang sangdonger asütsü, ta ANSCU-isa ashi.
Nagaland University-i maneni junga inyakba aser kaketshirtem jenjang ajungtsü atema inyakba asoshi ANSCU-i pelar, ta sangdong nungsa shia lir.
Union-isa stream aser subject balala nung toppers ajanga nüma atanger aser tenüngsang agütsür, iba den külemi takok angur kaketshir ajak nem tenüngsang agütsür, ta sangdong nungsa shia lir.