ANSPA Kohima Unit-i skit competition ayongzüka agi

Kohima, August 5 (TYO): All Nagaland Private Schools Association (ANPSA), Kohima Unit-i “Sanitation, Substance Abuse, Technology” omen nung ajemdaker Inter-School Skit Competition ka ayonga agi.
Sentongji Don Bosco Higher Secondary School nung agi aser tongti tesemdanger Kohima Deputy Commissioner, Rajesh Soundararajan-i kaketshirtem dang extra curricular activities nung shilem agitsü tayongzükba agütsü.
Paisa, kaketshirtem dang tajung aser tamajung bendangtsü aser technology timi amshitsü ayongzük.
“Meranga inyakba nungi pilaa teli. Meranga inyaktsü atema yimya süba-ang. Mezüngbo ibaji tasak asütsü saka asenoki dang merangerbo ajak takoktsü lir” ta Rajesh Soundararajan-isa shisem.
Sentong nung ANPSA Central President, Bithungo Kikon-ia o jembidang, tanü Tsüngremi Nagaland nung süngyanglutem tsüngdang apudaka mekülemertem bushir, ta ashi.
Sen indang süngyanglu, ochimashi indang süngyanglu, tashi indang süngyanglu, kin indang süngyanglu tsüngdang mapudakertem Tsüngremi aginür, ta paisa kaketshirtem dang ashi.
Nagaland nung education system ji linük nung tajungtiba rongnung ka lir, saka asenoki tazüngba tsütsü jenjang tulu tongtetaka, asen lenmangtem ongken agi sünga lir, aputem chireper, electricity junga mangur, water supply peria mangur. Iba atema asenoki kanga süoki ia bilemtsüla aser tesüibatem meyipa reprangshir, asenok takümtem melenshitsüla, ta Bithungo Kikon-isa kaketshirtem ayongzük.
“Asenoki angazüktsü atema dang temulung agütsür aser temeim- Tsüngrem meimtsü, nübortem meimtsübo amadoker. Ajisüaka, temeim ajanga dang asenok ajungtsü. Tsüngrem aser nisung meimba ajanga dang Nagaland yanglushitettsü” ta paisa shisem.
Sentong nung ANSPA Kohima unit President P. J. Nathan-i tesentepertem pela agizük aser Kohima unit Vice President Keneiü K. Metha-i anküp tepela o jembi.