ANSTA aser NSSFOF nati anogo ananübuba lungkak ait

Kohima, May 25 (TYO) : All Nagaland School Teachers Association (ANSTA) aser Nagaland Secondary Schools Field Officers Forum (NSSFOF) züngsemtemi anogo ananübuba longkak aita ‘mass casual leave’ agiba ajanga Nagaland nung sorkar school tem timtem ajuruogo.

Osang angazükba agi, ANSTA aser NSSFOF ketdangpurtemi tanü School Education & SCERT Minister, Yitachu den ajurutep aser iba onük benoka olemtep.

Parnoki Yitachu den tebilembatem lemsatepba den külemi Higher Secondary Education nungi Secondary-Elementary schools balaka razüka aotsü takhangba agütsüba nenshia metetdaktsü.

Minister-i ketdangsübarenbo balaka razüka otettsü saka kaketshirtem ajungtsü mechi classroom bo balaka razüka motettsü ta lungkak aitertem dang ashi aser lungkak aitba sentong anentsü mepishi ta osang ajanga metetdaktsü.

Ajisüaka, Brihostibar tashi nung telangzüba tajung magütsüra, June 1, 2016 nungi parnok mapai moi lungkak aittsü ta lungkak aitertemi Minister dang ashi, ta osang ajangasa metetdaktsü.

Parnok nem tezüluba nung telangzüba tajung magütsü tashi lungkak aittsü ta ANSTA aser NSSFOF nati nenshia metetdaktsüogo.

Yashi parnoki State Chief Secretary den ajurutep saka iba senden nung telangzüba tajung kecha monguteti tembang.