ANSTA-i adhoc tesayurtem atema Court nung IA file asütsü

Kohima, Chiteni/July 05 (TYO): All Nagaland Ad-hoc Teachers’ Group (ANATG) 2015 batch-i service regularisation atema takhangba agüja lumai longkak aitba anenba, aser sorkari court matsüngdang interlocutory application (IA) masuba nung ajemdaker All Nagaland School Teachers’ Association (ANSTA)-i adhoc tesayur 1166 tenüng nung IA file sütsütsü.
Tanü nikongdang Kohima nung osangbenertem senden nung jembidang NSF Tir, Kesosul Christopher Ltu-i, Naga Students’ Federation (NSF), Eastern Naga Students’ Federation (ENSF), ANSTA aser ANATG den senden aika amenba sülen iba telemtetba agi, ta metetdaktsü.
Paisa, arok senden nung, sorkar aser ANATG batch 2015 napronglai court matsüngdang Interlocutory Application (IA) file mesüteter ta ashiba ajanga ANSTA-i adhoc tesayur 1166 tenüng nung court nung ibaji file asütsü telemtetba agiogo, ta metetdaktsü.
Ltu-i ashiba agi, kodang IA ji file südir telok pezü- NSF, ENSF, ANSTA aser ANATG senteper Fast Track Pace ajanga court nung Interlocutory Application (IA) onük atema inyaktsü.
Kasa osangbenertem senden nung ENSF Tir, Sepili Sangtam-i, kaketshirtem aser tesayurtem naprongla ajangzüktsü atema o tatsü-talang lemtepba sülen tesayur 1166 nungita sorkar aser court nung benoka inyaktsü aser ibaji ajanga tesayurtemi akhangba tekaraba nung ataloktsü atema amalitepa inyaktsü lemtet, ta metetdaktsü.
ANATG otongdar, Bendang Ozukum-i NSF, ENSF aser ANSTA-i Aami/June 30 nü tiyongtsüi aita inyakba ajanga lumia akhangba thinen, ta parnok dang pelaba lemsatep.
Adhoc tesayur 1166-i ANATG kübok Aami/June 18 nü Directorate of School Education kima mener longkak ait tenzüka liasü, aser o lemtepaka telemtetba tajung ka dangi maruba ajanga Aami/June 29 nungi ad-hoc tesayurtemi mapang telatet ka makai lumia longkak ait tenzüka liasü.
Iba sülen NSF, ENSF, ANSTA-i tiyongtsüi aita Aami 30 nü tesayurtem den longkak aitba tesem nungji senden ka amenba sülen mapang tatsüka atema lumia longkak aitba thinena liasü.