ANSTA Sub-Unit Mangkolemba-i SDEO Office nung Head Assistant ka meshir

Dimapur, July 6 (TYO) : Sorkar mapa inyaker Thsipong (Head Assistant)-i sorkar tetuyuba sülen manidakba aser tashi mangaba ajanga Sub Divisional Education Officer (SDEO), Mangkolemba nung timtem adoka lir ta ANSTA Sub-Unit Mangkolemba-i School Education Director dangi shidi ka ajanga metetdaktsü.
District Education Officer (DEO) office, Kiphire nung May 23, 2016 nü Thsipong indang attachment order agien saka tanü tashi pa SDEO office, Mangkolemba-i maru lir. Iba ya ajanga sorkar mapa inyakeri Education department aser sorkar hao ta maliba aser akhüm metsübuba sayur, ta ANSTA Sub-Unit Mangkolemba Tir, Senlikaba aser Tongti tezülur, Tsungdar nati sangdong nung shia lir.
June 1, 2015 nü pa SDEO office Mangkolemba-i promotion nung transfer asü aser iba mapang pai küm asem tashi transfer memeshitsü atema tenangzükba agi. June 5, 2016 nü pai SDEO office Mangkolemba nung joining report agütsü saka pa anogo ka danga office-i maru, ta ANSTA Sub-Unit mendenpurtemisa metetdaktsü.
Sorkar mapa inyaker kati ita 10 tashi mapa meinyaki aruba atema kanga aoksar. Talisa, Thsipong, HA-i mapa meinyakaka tesüiba ita 10 tashi itasenbo agizüka agiba atema kanga süngmanger. Anungji, School Education Director-i iba atema telangzüba agütsütsü asoshi mepishia asüngdanger, ta ANSTA Sub-Unit Mangkolemba sangdong nungsa shia lir.
School Education-i Thsipong, HA anema disciplinary action agitsüla aser SDEO office Mangkolemba nung tetsükdaktsü melii mapa inyaka otettsü atema HA ka tekaratiba nung yoktsü onoki mepir. Onoki mepishia asüngdangba ama mapa meinyakra, onoki junger ta bilemba mapa inyaktsü aser iba asoshi onoki tebilemtsü khuret kecha mabentsü, ta ANSTA Sub-Unit Mangkolemba-isa metetdaktsü.