ANTA-i longkak aitba anen; aibelener nem bail magütsütsü akhanger

Kohima, September 07 (TYO): ANTA-i maneni September 2, 2017 nü Taxi anir, asür Swuduve Nakro tepsetertemji parnok ket nung agüjang, ta takhangba agüja Brihostibarnnüa longkak aitba den külemi tanü Kohima nung taxi kata mesenzü.

All Nagaland Taxi Association (ANTA) HQ Kohima leniba nung tanü Indoor Stadium, Kohima kima taxi anirtem adenshia, item ama ozüng alema inyakertemi mapang shia timtem agütsüba indang metetdaktsü.

Parnokisa maneni nisung tepsetertemi parnok ket nung agüjang, iba sülen ozüng alema inyakertem dang tansütsü ka metetdaktsütsü, ta takhangba agüja ayimten.

Ajisüaka ANTA Tir, Vibasetuo Solo leniba nung ketdangputemi ANTA züngsemtemji azüoktetba ajanga tensa meraksa.

ANTA ketdangpurtemi lokti dang, tamalen parnoki akhangba ama district administration aser police-i kanga kera aibelenertem anogo ka tsüngda puogo, ajisüaka police aser administration ji ozüng kübok inyaker, anungji aibelenertemji public ket nung agütsütsüji tamakoktsü, ta metetdaktsü.

Solo-isa, aibelenertem nem bail magütsütsüla, aser parnokji bail nung chioka langka danga atalokra iba khuretji ANTA aser züngsemtemi mabentsü, ta metetdaktsü.

Paisa, advocate densema nisung kari danga aibelener nisung tamajungertemji bail nung agizüktsü atema inyakra iba anemaji sashia inyaktsü; aibelenertemji akümli piyong tepoukdak ayutsüla mesüra tasüba temerenshi agütsütsüla, aser ibaji ANTA takhangba lir, ta metetdaktsü.

ANTA ketdangpurtemisa, “Tongtibang tesem ajak nung security tajung agütsütsüla, iba den külemi CCTV cameras inoktsü aser taxi tem koba tesem nung senzürar metettsü atema garitem nung microchip inoktsü atema takhangba agütsüogo,” ta metetdaktsü.

ANTA ketdangpurtemisa, “Takoksa angur kibong nem senotsü teyari agütsütsü, asür kinungtsü nem mapa ka agütsütsü aser asür chirnur parnok pongu class 10 tashi shisaliok nung yaritsü atema takhangba agütsüogo,” ta metetdaktsü.

ANTA-isa, parnoki akhangbatemji mapang tatakzük ka nung mataloktsüra parnoki maneni ano longkak aittsü, ta metetdaktsüogo.

ANTA ketdangpurtemi metetdaktsüba nung ajemdaker züngsemtemi tashi angaa longkak aitba anen, ajisüaka parnok tejashi sayua tanü gari mesenzü.