ANTAM-i 44 AR inyakyim aitsür

Dimapur, May 21 (TYO): May 20, 2017 anepdang 44th Assam Rifles-i ANTAM tir, I Tali Jamir apuba kukua aitsür, ta All Nagaland Taxi Association Mokokchung (ANTAM)-i sangdong ka nung ashi.
ANTAM tirji Honibar anepdang Alino bus counter nung Naga Political Groups (NPGs) ka nungi sen saruba shidi agütsütsü atema aodang Assam Rifles sepaitem civilian dress nung pa apu aser gari nung anioker 44th AR Camp-i anir ao. Idakji asüngdangya asüba sülen pa Mokokchung Police Station-I ket nung agütsü, ta ANTAM sangdong nung shia lir.
Assam Rifles-i asüngdangya asüba nung ANTAM tir dak tai mesüra pai aibelena inyakba kecha meputetba agi pa chiok. Ajisüaka, iba inyakyim ajanga ANTAM tir nem timtem tulu agütsüogo aser amajok nung tekolok anibelemdaktsüogo. Maneni, iba inyakyim ajanga Mokokchung district nung aliba taxi anishirtem nem tetsübu tensa ka bener arutsüogo, ta ANTAM Tatong Tir, S. Toshi aser Tongti Tezülur, Meren Longchar nati sangdong nung shia lir.
ANTAM-i nübor tenzüktsü asoshi bendang agüja mapa inyaka arur aser tanga teloktem aser shishilembaba teloktem ama, Naga Yimten Teloktemi onok danga mapang shia sen meshiba shiditem yoker. Ibala sen meshiba shiditemji mendenpurtemi ketdangsüa repranger. Anungji, ANTAM tir tenüng zülur yokba shidi ka atema pa apubaji tim masü aser ozüng alema inyakba ka lir.
Ibala inyakyim ajanga Mokokchung nungdang masü saka Nagaland ajungalen onoki inyakba mapa nung tetsükdaktsü ajurutsü. Anungji, nüji shisatsü aliba nisungtemi ajaki iba inyakyim kukua aitsütsü ayongzüker, ta ANTAM mendenpurtemisa ashi.
Iba tatalokba osang angashiba sülen ANTAM züngsemtemi tetenzük nungi tatem tashi yaritepba aser ano Mokokchung District Trucks’ Association o Mokokchung District Pick-Up Union temi onok pusema nungitba atema kanga pelar. Maneni, ANTAM legal advisor Advocate Mangko aser lawyer Takum Jamir nati iba tatalokba nung yaritepba atema tena dang kanga pelaba shisemer, ta Tatong Tir aser Tongti Tezülur natisa metetdaktsüogo.