Anthony Shimray chiokba atema pelar : NH, NSF & NMA

Dimapur, August 17 (TYO) : India sorkari Naga Yimten teloktem den Cease fire tenangzüktep agiba sülen Naga nunger lokti tentettemi India sorkar dang Naga yimten lennirtem tepuokdak nungi chioktsü atema mepishia arur. Ajisüaka, Naga nüjiso atema rarartem aika ozüng tesashi kübok aija tepuokdak yua lir aser cease fire mapang nunga parnok temeten mengui timtemer, ta Naga Hoho, Naga Students’ Federation aser Naga Mothers Association külem sangdong ka nung metetdaktsü.
Iba takhangba angateta India sorkari August 2, 2016 nü Anthony Shimray chiokogo. Pa ya Indo-Naga yimjung olemtep nung züngsem ka lir aser pa küm 6 jungnüa tepuokdak ayuba sülen August 3, 2016 nü par kibong den tanaben longjemogo, ta NH President, P. Chuba Ozukum, NSF President, Subenthung Kithan aser NMA President, Abeiu Mero nungertemi sangdong nung shia lir.
India sorkari yimjung maparen atema nendaka bilemtsüba aser süoki ia agiba atema kanga pelar aser maneni India sorkari telok mereprangi Naga nunger yimten lennirtem tekaratiba nung tepuokdak nungi chioktsü atema takhangba agütsür, ta parnokisa shisem.