Anti-Brexit teloki longkak tulu aitsü nükjidong lir

London, January 28 (Agencies) : Alima tesem aika nung Trump anema longkak aitba sülen tali ajungmesoa ano Anti-Brexit teloki tawa tanü Britain otsü nung longka tulutiba aita otsü tasen yanglutsü nükjidong lir, ta Honibarnü osangbenertemi metetdaktsü.
“Europe asoshi lungjemdi” teloki March 25, 2017 nü parliament kima longkak aitsü sentong yanglua lir. Iba anogo ya Ato Kilonser Theresa May-i European Union (EU) nungi Britain pilatsü la sasa sangdongba tesüsabuba hopta lir. Iba longkak nung nisung million kashi arua adentsü imlar, ta osangkakettem nung shia lir.
“Iba longkak ajanga arrla 50 raksatsür ta onoki bilema mali, ibai Brexit anem tashi sayurba lir,” ta Europe asoshi lungjemdi telok nungi Peter French-i ashi.
2003 küm Iraq rara anema longkak aita jajabaji longkak rongnung tulutiba liasü. Iba longkak aitba sentong nung nisung 750,000 dena liasü ta police temi züngdangtet aser tayongertemibo nisung million ana adenshi ta asadangteta lir.
Tang tashi nung anti-Brexit teloki longkak aitdang July 2, 2016 nü nisung 50,000 adenshibaji aiba lir aser iba sülen August aser September itatem nunga longkak tilala anaben aitogo.
Tan longkak aitsü ayongertemi Metropolitan police, Greater London Authority aser Westminister council den parnok longkak aita jajatsü lenmangtem asoshi angatettepa inyakdar.