Anti-encroachment drive sentong ayonga agiogo

Anti-encroachment-temi chen rongtoktsüba noksa nung angur. (APRO Bhandari)

Dimapur, Chiteni/July 11 (TYO): Wokha District kübok Yimparasa, Bhandari aser Longayim nung sorkari alir aliba ali atsüngda aruba anema inyaka aruba nung metenloka July 10 nü Forest, District Administration aser Police senteper Anti-encroachment drive ka ayongzüka agiogo.
Sorkari alir aliba ali nung ozüng alema süngtong temer aliba 10,000 dak tema iba team yagi merekteta liasü. Ali acre 50 shi nung ozüng alema Teak, Khonkon, kozü aser Yongjak tontem temer liasü aser iba den mongutonga densema liasü.
Anti- encroachment Team-isa, alu jen 20 shi bensaja rongtoktsü, atsü atsür aliba raksatsü, ango tzübo aser ozüng alema lenmang tur alibatem raksaja liasü.
Parnok JCB ka amshia gari senzütettsüsa gari lenmang tur alibatem tusatsü aser atsü atsür aliba bentsüba den ango tzübotem ajak ali bener arua nembangja liasü.
Iba drive metenzük tsüngda Merapani, Forest Range Office, Divisional Forest Officer, (DFO) Wokha, Zuthunglo Patton, IFS-i, anti encroachment drive sentong ayongzüka agiba ya, Yimparasa, Bhandari aser Longayim nung sorkar ali atsünga arur kiojen yanglua aliba aser süngtonglitong tsünüa aliba aginja sorkar ali kümzüka ayutsü nükjidong nung agi ta ashi.
Team-isa, item tesemtem nung tanaben ali atsünga marudaktsütsü asoshi ozüng alema inyakba inyakyimtem ketdangsertemi maneni meita ataa alitsü ta shiogo. Kasa mapang nung tarutsü nungbo sorkar ali atsünga arurtem nem temzüng ozüng kübok tapet temerenshi agütsütsü, ta parnokisa ashi.
Anti-encroachment drive nung Divisional Forest Officer, Wokha (lenir) Superintendent of Police, Wokha, Addl. SP Wokha, SDO(C) Wokha, SDO (C) Bhandari, EAC Bhandari, Asst. Commandant 12 IR Camp Merapani, SDPO Bhandari aser Forest department, District Administration aser Police department nung ketdangsertemi dena liasü.