Anüdoklen alir Naga nungertemi sorkar ka akümer

Dimapur, Jan.23 (TYO) : Anüdoklen alir Naga nunger yimten telok kati  Eastern Naga National Government (ENNG) akümba osang ka metetdaktsüogo. Iba sorkar nung ya nisung ka tenüng agi Wb.R.Stephen Naga tir ser January 14, 2016 nü to kümogo ta parnoki sangdongba osang ka nung metetdaktsü.
Iba sorkar nung Home Affairs minister Wb.Khongwong Mossang, Defense minister Wb. Saimon aser Foreign Affairs minister Wb. Kim Juv NG shimtetba osang kasa sangdong nungsa metetdaktsü.
Iba ENNG telok nung sepai telok ka alitsü aser parnok dangji Eastern Naga Independent Army (ENIA) ta ajatsü ta parnokisa metetdaktsü.
“Onoki onok Naga nunger kümdaktsüba otsü aser sobaliba akümtsübur. Onoki anüdoklen alir Naga nunger yimtenren, rongsenren, loktiliba aser tanülaren nung tejakleni tajungba küma renloktsü asoshi bendanga agüja inyaktsü,” ta ENNG telokisa metetdaktsü.
“Yisu Khrista tenüng nung ozü lima aser nübortem moajang ta Tsüngrem tsüngdang onok teka mekanga sarasademer, kechiyong anüdoklen alir Naga nungertem ya tebang agi ashitsü makokba timtem reshikangshi, ayatzüra aser timtem ajuruogo. Itemji Naga nunger yimten telok aser lenirtem balalai taoba küm aika Northeast nung alir telungpurtem tashi angaa junga anepalu mesüi mashi lenmang  nung jajadaktsüba ajanga liasü,” ta parnokisa metetdaktsü.
ENNG yagi Myanmar nung aliba Naga nungertem asoshi bendanga agüja inyaktsü aser Myanmar nung NLD teloki aniba sorkar den anüdoklen alir Naga nungertem  ajungtsü indang ajurutepa jembitsü ta parnokisa metetdaktsüogo.

You must be logged in to post a comment Login