Anüngdang Pungmang-Mangdang aser iba indang arok-aroka shisadangba (A day dream-vision and its thoughts)

– R. Imkong Lkr, Diphupar : Dimapur.

Kenü anogo tsüngsang mopung mejungi tsünglu aruba anogo ka nung kü kija tebilemtsü agi sünger kidang mena aliba mapang ka, kibong tajung ka nung tasü tama ajuruba osang tamajung ka angashi. Aser ni iba osang angashia animesüngzükteti aküm, aser tasü tama ajuruba kibong atemaji kanga nemjemseta bilema liasü. Saka iba tia-ji akümlir wadang yimya ka dang ta bilema aru. Aser pa mesüra la asüba tanüla (soul)-ji koda asütsü aser koleni aotsü ta kanga arok-aroka shisadanga liasü. Saka temeshi Laishibai yamai ashir, tebutem tai temenenji techiri mabentsü aser techirtem tai temenenji tebutemi mabentsü ta Ezekiel tapu 18 tekong 20 nungji jangja-jangja shia angur; aser ano tekong 21, 22 nungji yamai shia angur, saka kodang temenen puri temulung meyipa kibuba dangi arudir pabo kümzüktsü ta shia angur, koda tepelatsü, teyimla tulu lir. anungji asen taküm tajung nung alidang züzüa malitsüla, saka taküm liba-liro nung kanga asüngteta, azüoka alitsü-baji koda tongtipang ta rajemdaktsüner. Yamaji asenok ajak kenü anogo pai aja dang kecha tebilemtsü mekai sadok-sadoka tekümzükdagi aotsübaji koda jangratemtsüka asütsü, aser iba asoshiji asenok ajaki kümdanga saksalema lidi ta amangba purtem ajak dang ayongzüker.
Taoba mapang ka nung ajangshia aruba otsü den Laishiba nung Khristan taküm otsü den Laishiba nung Khristan taküm ka Aeini aoba otsü tu kü mulungi jet ta yimdangi aru. Aser iba tatalokba otsü ya “Anüngdang pungmang-mangdang” aser iba indang arok-aroka shisadanga bilemdangba (A Day-Dream-Vision and its thoughts) den medemtanga iba indang tatsüka shiyonga aodang asen nübur karbo tajangzük ngudi-sü ta sarasadema zülur.
Kenü anogo nisung ka aremi yataentatsü, ansotsü (vegetables) bushiyonga ao, arem donger külen ansotsü tapu-meina yata-enta senzüyar külen, khu amena bener khu-yu tu bushi aru. Aser yangji pai mi (fire) aputeta yur külen sarasadem ka agia liasü. Iba sülen pai bener aruba chitem aser aontem (rice and curry) tu salaa nangnanga chiyonger külen tatsüka anisüngzüka amen. Iba sülen pai aonsutsü bendena aliba tu jungjunga khu ka küma zep ta oshia benloker lenmang lendi tu pungteta tugutsü ayameso, aser kodang yim tu adongtsü ta yongyaseta tera ilonga jajadang memeteti ka meyu-tenzüka O’he, O’he ta lenmang tasak aser talangka tugutsübaji tebilemtsü kaseta tugudang tu lenmang aibelena-dok, aser ni ya kolenbai tugur ta kanga rataseta aküm. Idangji joko tera mangsemtua kümer liasü, aser tesem ajaklen shiruru ola tapu-aika angashir aser joko yim atongtsü teyimla tu (confident) sama aküm, aser terata tulu nung tapi agi nemdena jajadang khen-khen süng-tembang nung metsüdakli aser khen-khen lung nung metsüdakli ta tugutang tu khu taret abenba tubo amatoker, oda kü taküm ya iba arem nung shiruru tesashi tamajung kar ajurua nguseta achi nungbo ta külen shisa bulur, aser ano külen mopung tamajung semloka teyarir shinga mali nungji iba arem nung ya kü taküm, senti taküm ya shingaia memeteti samatsü no! ta kanga shisa bulua tugudang tu, kü temang tubo ai (thorn) agi tawa meketi rangsaa tusar aser ano külen asentsü (sweat) agi kü temang tubo tzü chikor amatu yimpanger aser joko kechianga mesayanger ta alidang tu, kü lanuwa (child-hood) mapang school nung Bible scripture azüngba tu bilemteta aru; aser iba Bible tekong ya “kibuba kü sannüker” ta azüngba tu bilemteta liasü. T.Ken 23:1. Aser tangaba kaji “khristan Aeini-aoba” otsü tu bilemteta aru, (travelling in the meadow) iba denji otsü zulusang John Banyan tu bilemtetdang ni tesüngmangtsüka tepela tesünep angu. Kechiyong khristanba taküm den kü taküm tia medemdangtang kanga mesüktepa liasü.
Aser yamaji khristanba taküm tua khuret tulu bener tasü akhüm lenten ammang tulu ajangdang jajar külen-ang tatem nung kangki (cross) ka anasa aru aser kodang pai kangki nung tu tanen makai reprangzüka yok, iba mapang nungtu memeteti-ka pa tenük nungi nüktzü (tears) alua ajebtsü tenzük, aser idang tu pai khu taret bena aliba tu kangki tsüngdang mi (fire) agi rongzüka tsüker amai tsüka-dok, aser idangyongji temenen khu tu kangki tsünglangleni longzüka lua adok aser jokomengui aküm. Aser idangji pai tepela tulu nung Tsüngrem tenüng sanga joktena ken tenyonga ao.
Yamaji arem mein (forest) nung tu pa kija ammang nung tu nemtena jajatang tu tebang agi ashitsü mekoki belemseter tetsübu aser tatenten den ano aya-tsüra (hunger and thirst) agi joko lumiseta alidang tu tesem ungsem ka nung memeteti ka mena dok aser pai bena aliba khu tua yangji lao-adok aser iba mapang tu pa dak aliba tashi (strength) tu tema doker (exhausted) liasü, idangji pa tu khen tatsüka lumiseta amuzüka oa dok. (a short nap). Idangji pungmang-mangdang ka (a dream-vision) angu. Aser pa mejanga oa aliba tesem jagi nisung sentsüprang keter ka aru aser pa nem aou pungdang taki ka (a bamboo cup) nung ninang mojitsü ama tanang tajemtsü bener arua agütsü aser pai aji meshizüka jangratema jemer külen, pa tu asangsang nunga temang nungtu tashi itta aküm. Saka nisungba tubo koleni ao-ar pai mengui aküm. Yamaji pa mejangba nungi saakdangbo kecha tetsübu mali aser temang nunga tashi kanga itta kümer liasü. Aser pa tu, pa kisüng masü saka pa den teyarir ka lir ta temulung kanga lema tasü itta aküm aser pai idangji sarasatemtsü bilemtet. Anungji pai ajem-ajema mener Tsüngrem nem tenüngsang agütsü, aser pai sarasademtang yamai shia liasü, o takoksang Tsüngrem, nai ne tenzüker tenyar kü dangi yoka yariba asoshi pelar aser maneni ni ne den jajatsü mulunga lir, amen ta atemtang ita (moon) adoka pa dak tesangwa yamoka yaloktsü aser ita tesangwa nungji pelaseta khu taret tu tanaben benloker O’he, O’he, ta meyu tenzüka arem nung tu nemtena tugudang tu aoksaka lenmang lendi tulu ka pongteta adok. Idangji pa mulungjang tu kong-ang ka meyui tepela agi asüng. Aser iba lendi nungjagi tatsüka jajayonga tugutang tera anasa nungi kari ola ka O’ho-ho-ho, ho-i ta agütsüba pai angashi, aser ya shiba ! aser shirnok ta rataseta alitang kabu, kabu, tino, tino ta parnoki pa aja. Tino ta ajaba tetezü zünga-pu ka aser kin kidong ka pur dang ajar. Aser pa apika nung lia (a short distance) nungi ajasang tu pa tino Temjenba liasü aser pa den ano medemer ishika anidaka liasü. Aser parnokbo ni arem nungi menua madokba agi lenji arurba liasü. Aser parnoki pa tang jungogo ni ta ashi. Tetezü atongtetogo ni, saka pelar ta shiba o lir. aser pai bena aliba khu tu parnoki belenzüka bener pa tama südaktsür parnok ajak kanga pelatepa tugua ki atong. Aser arem nung tu kechi kodasa atalok aser pa koma ka timtem ajuru, item ajak tu otsü tatongi shiyonga aodang pa taküm tu pungmang ka mesükba nungi asangsang nung nüchi angu. Yamaji pa taküm nung Tsüngrem o temulung nung rizünga aliba ajanga timtem anogo mapang nungjia kanga tajangzük tulu angu. Aser khristan Aeini-aosang tu, pa tia den apet kanga mesüktepa atalokba asenoki angur. Aser iba tatalokba otsü ajanga pa taküm tanaben tanela nung asoba jangjajangja meteta aküm. Yamaji Khrista dak amangba-pur shia pei takümji Khristan aeini aor kaka mesüka lir, aser asenok ajaki metet, shibai timtem kanga ajurur pai-ang tali tejangjaba Khristan taküm kaji meteta akümer. Yamaji sayutsüngir tulu Saul shiba dang Paul ta-ka ajar, pai-a ashir, Khristan taküm kaji alima nungbo timtem tejashi jenti angur, saka tatem nung pai tajangzük tulu angutsü ta shia angur, yamaji Khristan taküm kaji alitsü tangashir aser tazünger ajaki merangtepdi ta ayongzüker. Amen.