Anünglak senzür 3-i ISS bushia tuogo

Kazakhstan kübok Baikonur cosmodrome nung Russia nunger cosmonauts 2 – Sergei Ryzhikov (Tsünglanglen) o Andrei Borisenko (Temalen) na aser US astronaut, Shane Kimbrough nungeri anünglak tentetba International Space Station (ISS) bushia atuba jakdang anünglak tayimtsü, Soyuz MS-02 nung nokdaker teka ayiploktsüba noksa angur. (Baikonur, October 19)

Baikonur, October 19 (Agencies): Russia nunger cosmonaut 2 aser US-i tentetba NASA astronaut 1 densema, anünglak senzür nisung 3 tashi Soyuz anünglak tayimtsü nung mener anünglak tentetba International Space Station (ISS) bushia tanü, Bodbar nü anünglakleni tuogo.
NASA’er Shane Kimbrough aser Russia’er Andrei Borisenko o Sergei Ryzhikov nungeri Kazakhstan nung tentetba Baikonour cosmodrome tanep 8:05 ako meta toktsü aser anogo 2 agia anüng nung jajaba sülen tan Hokolbar nü ISS atongtsü alizüng lir.
Par asemi ISS nung taruba ita 4 tashi monga, tetendangba mapatong balala inyaktsü alizüng ayuba osanga jangjaogo.
Par asemi ISS tonga atuba sülen US’er anünglak tayimtsü, Endeavor nung anogo 16 tashi anünglak senzür, arishi küm 49 tain Kimbrough lenisüba kübok par asemi anünglak tentetba orbital laboratory nung par tetendangba maparen inyaktsü.
Par asemi ISS tonga atuba sülen idakji tang tetendangba agia alir anünglak senzür 3 – Russia kübok tentetba Roscosmos’er anünglak senzür, Anatoly Ivanishin, NASA’er Kate Rubins aser Japan Aerospace Exploration Agency (JAXA)’er Takyua Onishi nungeri tan October ita 30 nü alima bushia alutsü sentong lir.
Anünglak tayimtsüji anüngleni kaketa yoker minute ishika süir külen, tan ISS bushia atuba mapatong takok anguba osang ka Roscosmos-i jangjashitsü.
Roscosmos flight engineer, Borisenko-i ISS-i mezüngsüa 2011 küm atu aser pai idakji anogo 164 tashi among saka Ryzhikov-ibo tan mezüngsüa anünglaki atur lir.