Anünglak senzür, Kelly o Kornienko na alima tonga aluogo

Anünglak senzür, Kelly o Kornienko na alima tonga aluogo

US astronaut, Scott Kelly (Abelen), Russia cosmonaut, Sergei Volkov (Tiyongtsü) aser Russia cosmonaut-sa, Mikhail Kornienko nunger anünglak toktsür alima tonga, Kazakhstan kübok Zhezkazgan yimti tezülen aluba sülen agiba noksa ka yangi angur. (Zhezkazgan, March 02)

 Cape Canaveral, March 02 (Agencies): US sorkari tentetba National Aeronautics & Space Administration (NASA) anünglak senzür, Scott Kelly aser Russia nunger anünglak senzür, Mikhail Kornienko nati anünglak tentetba International Space Station nung küm 1 shi aliba sülen tanep, Bodbar anepdang alima tonga aluogo.

Meimchirtemi tarutsü mapang nung Mars tonga aotsü lenmang bushia Kelly o Kornienko nati anünglak küm 1 shi aliba sülen tenati anünglak mapang talangtiba otsü tasen yanglugo.

Kelly aser Kornienko na den külemi, Russia nunger anünglak senzür tanga ka, Sergei Volkov nungeri Soyuz anünglak tayimtsü nung ghonda 3 ser tesadang ka shi jajaba sülen parnok Kazakhstan kübok Zhezkazgan yimti tezülen tanep 10:26 ako meta anenzüka liasü.

Kelly o Kornienko nati anünglak tentetba Space Station nung anogo 340 tashi amongba sülen tan alimai tanaben meyipa alur lir.

Volkov-ia kasa Space Station nung ita 5 ser tesadang ka shi amongba sülen Kelly o Kornienko na den aroki alima tonga aluba osang jangjaogo.

Arishi küm 52 tain Kelly aser arishi küm 55 tain Kornienko nati anünglak alidang mozümora den sentakba tendangba sentong balala agiba den külemi, meimchirtemi radiation miim alidak, anünglak taküm alitsü den sentakba bushisüngdang jenti agia liasü.

Tenati bushitetba nung ajemdaker, NASA aser par tentet den amalitepba tentettemi küm 2 shi anünglak jaja Mars tonga anünglak senzürtem yoktsü alizüng tulu yua lir.

Kelly-i tan anogo 340 tashi anünglak aliba ajanga pai külem sensopur, Michael Lopez-Algeria-i 2007 küm Space Station nung anogo 215 tashi monga US anünglak senzür rong nung anünglak mapang talangtiba amonger anünglak senzür akümba otsüa ajangtetogo.

International Space Station ya United States, Russia, Europe, Japan aser Canada nunger densemba linüktemi aroki lungjemer alima nungi kilometer 400 shi pilar anünglak tentetba Space Station lir.

You must be logged in to post a comment Login