Anüolentip state temi Centre anema noktaker

Thiruvananthapuram, Rongchii (April) 9 (Agencies): Kerala yimtiba Thiruvananthapuram nung Sangtennü (Mongulbar) India kübok anüolentip tsütsü aliba state tem nungi minister tem senden ka amentsü.
Anüdoklentip tsütsü aliba state tem renlokdaktsütsü atema senotsü belener ta asüba ken o atema parnoki iba senden ya amentsü.
“Karnataka Agriculture Minister Krishna Byre Gowda, Puducherry CM V Narayanasamy, Tamil Nadu Deputy CM O Panneerselvam aser Andhra Pradesh Finance Minister Yanamala Ramakrishnudu mungertem iba senden nung adentsü” ta Kerala Finance Minister, Thomas Issac-i ashi.
Sendenji anepdang 10:00 ako nung tenzüktsü aser Kerala Chief Minister Pinarayi Vijayan-i mezüng o jembitsü.
Centre sorkari 1971 Census mesüi 2011 Census nung ajemdaker population data amshia 15th Finance Commission dang central tax revenues lemsatsü ashiba sülen iba ashishitepba onük ya adok.
“2011 Census nung nütsüng yongsük aliba nung ajemdaker inyakra, southern state tem takoksa tulu angutsü. 1971 aser 2011 tsüngda onok indang nütsüng yongsük 56% dang inlok. Kechiyong Hindi oshi jembiba (northern) state tem nung nütsüng yongsükji 150% dak tema inlokogo” ta Isaac-i ashi.
“14th finance commission-i latetba ama inyakba telatetba nung census dang melenra, Kerala-i sen crore 20,000 shi akoksatsü aser Tamil Nadu-i sen crore 40,000 shi akoksasü” ta paisa shisem.
Iba onük ya mezüng Andhra Pradesh chief minister Chandrababu Naidu-i ola adok aser pai “Centre mesüra State indang sen ta kecha mali, senji saru menokertem kindang sen lir. Southern state temi Centre nem tax teimba agütsür saka parnoki North renlokdaktsütsü atema sen belener” ta shia liasü.
Karnataka-i Central revenue noklang nung shilem 10 shi ka agütsür saka state-i 5% dang angur ta Siddaramaiah-ia metetdaktsü.
“Ni Andhra chief minister-i ashiba pusema nungiter. Karnataka Centre nem 9.56% saru agütsür saka senbo 4.5% shi ang angur. Centre-i Southern state tem bendanga amshir” ta Siddaramaiah-isa ashi.