Anupam Kher-i pa indang email id lemsatep

Mumbai, April 5 (Agencies): Nüngtugu actor Anupam Kher-i rongjena mesüra kanga ila bilemba nisungtem den sendakteptsü asoshi social media ajanga pa indang ‘e-mail address’ lemsatep.
Hombarnü, Arjun Bhardwaj, engineering kaketshir ka hotel ka nung floor 19buba kichiba nungi pongzüker soseta asüba osang angashiba sülen Anupam-i iba sangdong agütsü.
Pai iba sülen pa sapurtem den pa indang e-mail address lemsatepa liasü aser rongjena aliba nisungtem dang pa den tongteptsü asoshi asüngdang.
“Nenoki metetba nisung kar rongjena mesüra pei sasa kanga nema lua bilema aliba ajurura yimlibilema ‘anupam@anupamkhercompany.com’ ajanga kü dangi züluang,” ta pai Bodhbarnü tweed asü.
“Arjun Bhardwaj soseta asüba ajanga, rongjenba aser pei sasa kanga ila bilemba, lanurtem dak kanga bulua akümba tensa ka nung asenok alir ta jangjaogo,” ta paisa ashi.
Actor-i ashiba agi, pa semtepa aliba kibong ka nung intet anungji rongjenmataba memetet.
“Ni ainba mapang nung sensaker kibong ka nungi saka semtepa aliba kibong ka nungi intet, anungji teti kinungertemi dang meketbanger aliba ajanga rongjenba indang kangabo memetet,” ta paisa shisem.
“Asenoki lanurtem tebilembatem angaa parnok den mapang aben tebilemba lemsatepa alitsüji kanga tongtibang,” ta Kher-i ashi.